Policia e Shtetit ka finalizuar dy faza të tjera të operacionit ndërkombëtar të koduar “The Wanted”, në bashkëpunim me partnerët ndërkombëtarë, duke sjellë në Shqipëri dy shtetas të kërkuar nga drejtësia për vepra të rënda penale.

Nga Kolumbia është ekstraduar shtetasi kolumbian Saimir Rosales Rodriguez, 53 vjeç, i dyshuar si pjesëtar i një grupi të strukturuar kriminal. Ndaj tij, Gjykata e Posaçme Kundër Korrupsionit dhe Krimit të Organizuar kishte caktuar masën e sigurisë “Arrest në burg” në vitin 2022.

Rodriguez është dënuar nga Gjykata e Posaçme me 14 vite burg, pasi sipas hetimeve të SPAK dyshohet se kishte rol në përpunimin e një sasie të madhe kokaine në laboratorin e zbuluar në Frakull të Fierit, disa vite më parë.

Sipas hetimeve, shtetasi kolumbian dyshohet se ka shoqëruar një kontejner me lëndë narkotike, i nisur nga porti Buenaventura në Kolumbi, i cili ka kaluar përmes portit të Pireut në Greqi dhe kishte destinacion tranzit Malin e Zi, me synim përfundimtar Shqipërinë.

Ekstradimi i tij u realizua falë bashkëpunimit dhe shkëmbimit të informacionit mes Interpol Tiranës dhe Interpol Bogotës.

Në kuadër të të njëjtit operacion, nga Italia është ekstraduar edhe shtetasi shqiptar F. T., 38 vjeç, lindur në Bulqizë, i shpallur në kërkim nga autoritetet shqiptare për disa vepra penale.

Ai akuzohet për tentativë vrasjeje me armë zjarri, pasi në vitin 2024, në aksin rrugor Bulqizë–Tiranë, dyshohet se ka qëlluar me armë ndaj shtetasit A. P., pas një konflikti verbal.

Për këtë ngjarje, Gjykata e Dibrës i ka caktuar masën e sigurisë “Arrest në burg” për veprat penale “Vrasja me dashje”, mbetur në tentativë, si dhe “Mbajtja pa leje dhe prodhimi i armëve, armëve shpërthyese dhe i municionit”.

Gjithashtu, F. T. rezulton i proceduar edhe për veprën penale “Goditje për shkak të detyrës”, kryer në bashkëpunim, si dhe është dënuar më parë për “Mosbindje ndaj urdhrit të punonjësit të Policisë së rendit publik”.

Policia e Shtetit bëri me dije se operacioni “The Wanted” do të vijojë në bashkëpunim me agjencitë ligjzbatuese ndërkombëtare, me qëllim lokalizimin dhe ekstradimin e personave të tjerë të kërkuar nga drejtësia shqiptare.