Më 16 shtator pritet që Dhomat e Specializuara të Kosovës në Hagë të shpallin vendimin për ish-krerët e Ushtrisë Çlirimtare të Kosovës, rreth gjashtë vite pas nisjes së procesit gjyqësor.

Lidhur me këtë proces ka reaguar analisti Dardan Krasniqi, i cili, gjatë një interviste televizive, e cilësoi gjykimin ndaj katër ish-drejtuesve të UÇK-së si një “abuzim në emër të drejtësisë”.

Krasniqi deklaroi se akuzat e ngritura nga Prokuroria Speciale janë, sipas tij, të pabazuara dhe absurde. Ai u shpreh se pritshmëria e qytetarëve të Kosovës për 16 shtatorin është kthimi i ish-krerëve të UÇK-së në vendin e tyre.

“Ky proces është një absurd më vete. Ky është një abuzim në emër të drejtësisë. Procesi i ngritur mbi argumente qesharake.

Ne nuk mund të presim asgjë, përveç lirimit të tyre. Akuzat janë qesharake, pa asnjë kuptim dhe pa asnjë domethënie. Presim 16 shtatorin, që ata burra që sot janë atje dhe që janë emblemë e UÇK, të kthejnë në vendin e tyre”, tha ai.

Analisti kritikoi gjithashtu institucionet e Kosovës, duke pretenduar se ato nuk kanë treguar gatishmërinë e duhur për të mbështetur ish-krerët e UÇK-së dhe për të mbrojtur atë që ai i konsideron si vlera të përfaqësuara prej tyre.

“Mekanizmat institucionalë nuk e kanë treguar gatishmërinë më të mirë, nuk kanë dhënë ndonjë sinjal të veçantë në mbrojtje të vlerave që përfaqësojnë kjo katërshe në dhomat e specializuara në Hagë”, tha Krasniqi.

Vendimi i pritshëm më 16 shtator pritet të jetë një nga momentet më të rëndësishme të këtij procesi gjyqësor, ndërsa deklaratat publike në Kosovë vijojnë të ndahen mes mbështetjes për ish-krerët e UÇK-së dhe qëndrimeve në favor të procesit gjyqësor.