Një ngjarje e rëndë ka tronditur një shkollë private në Gosen-Neu Zittau, në Brandenburg të Gjermanisë, ku dy persona kanë humbur jetën pas një sulmi me thikë. Sipas agjencisë gjermane të lajmeve dpa, autori i dyshuar është arrestuar nga Policia.

Ngjarja ka ndodhur rreth orës 13:45, në kampusin e shkollës private Docemus. Pas disa telefonatave emergjente, në zonë është zhvilluar një operacion i gjerë policor.

Viktimat janë një nxënëse 18-vjeçare e shkollës së mesme dhe një burrë 30-vjeçar. Sipas raportimeve të mediave gjermane, 30-vjeçari dyshohet se ka humbur jetën pasi ka tentuar të ndalojë autorin.

I dyshuari është një 19-vjeçar, i cili dyshohet se ishte ish-partneri i 18-vjeçares. Ende nuk është bërë e qartë nëse i riu ishte aktualisht nxënës i kësaj shkolle apo kishte studiuar aty më parë.

Sipas të dhënave paraprake, sulmi është kryer me thikë. Ndërkohë, autoritetet nuk kanë bërë ende të ditur nëse ka persona të tjerë të plagosur.

Në vendngjarje janë angazhuar forca të shumta policie, zjarrfikës dhe ekipe të emergjencës. Gjithashtu janë kërkuar edhe dy helikopterë shpëtimi.

Policia ka deklaruar se po siguron vendngjarjen dhe se, bazuar në informacionet aktuale, nuk besohet se ekziston më rrezik për nxënësit apo personat e tjerë që ndodhen brenda shkollës.

Hetimet vijojnë për të zbardhur motivin e sulmit dhe dinamikën e plotë të ngjarjes.