Një operacion i përbashkët i policisë dhe doganës në portin e Hamburgut ka çuar në sekuestrimin e rreth 1.5 tonë metamfetaminë, në një prej goditjeve më të mëdha ndaj trafikut të kësaj droge në portin gjerman.

Droga ishte fshehur në një kontejner që, sipas dokumenteve të transportit, duhej të përmbante mijëra thasë me oriz të bardhë nga Pakistani.

Hetuesit kishin vendosur nën vëzhgim disa kontejnerë të ardhur nga Pakistani. Gjatë një kontrolli me rreze X, njëri prej tyre ngriti dyshime dhe autoritetet vendosën që ngarkesa të kontrollohej në mënyrë të plotë.

Në qindra thasë që paraqiteshin si thasë me oriz u gjet një substancë kristalore, e cila në pamje të parë mund të ngatërrohej me oriz.

Testet fillestare dhe analizat toksikologjike konfirmuan se substanca ishte metamfetaminë, e njohur gjerësisht si Crystal Meth.

Sasia e sekuestruar vlerësohet të ketë një vlerë prej rreth 28.5 milionë eurosh.

Deri tani, autoritetet gjermane nuk kanë bërë të ditur se kush qëndron pas këtij importi dhe as destinacionin përfundimtar të drogës. Prokuroria ka deklaruar se aktualisht nuk ka të dhëna që metamfetamina të ishte destinuar për tregun e Hamburgut.

Operacioni u realizua nga grupi i përbashkët hetimor kundër narkotikëve, i përbërë nga strukturat e Zyrës së Policisë Kriminale të Landit dhe Zyrës së Hetimeve Doganore.

Hetimet vijojnë për të zbuluar personat përgjegjës për transportin dhe rrjetin kriminal që fshihet pas ngarkesës së sekuestruar.