Egzon Bytyçi, 26-vjeçari i dyshuar për vrasjen e bashkëshortes së tij shtatzënë, Jetlira Foniqi, ka ndërruar jetë mbrëmjen e së enjtes në Qendrën Klinike Universitare të Kosovës.

Lajmi është konfirmuar nga drejtori i Mjekimit në QKUK, Shaqir Uka. Bytyçi ndodhej prej disa ditësh në gjendje të rëndë shëndetësore, pasi pas plagosjes së bashkëshortes dyshohet se kishte qëlluar edhe veten në kokë.

“Egzon Bytyçi ka vdekur në orët e mbrëmjes së sotme pasi nuk ka arritur t’u bëjë ballë plagëve”, deklaroi Uka.

Ngjarja e rëndë ndodhi mbrëmjen e 23 gushtit në fshatin Kërvasari të Malishevës. Rasti u raportua në Polici rreth orës 23:20, ndërsa çifti i ri u gjet i plagosur me armë zjarri brenda dhomës së gjumit.

Sipas të dhënave të bëra publike pas ngjarjes, Bytyçi dyshohet se qëlloi me armë në kokë bashkëshorten e tij, Jetlira Foniqin, dhe më pas veten. Rastin në Polici e raportoi babai i 26-vjeçarit, ndërsa në vendngjarje hetuesit sekuestruan një armë.

Jetlira Foniqi u dërgua me urgjencë në QKUK, por nuk mundi t’u mbijetonte plagëve. 25-vjeçarja ishte në javën e 34-t të shtatzënisë, vetëm pak javë para lindjes. Ajo ndërroi jetë pak pasi mbërriti në Emergjencë.

Ndërkohë, Bytyçi vijoi të qëndronte në gjendje kritike dhe mori trajtim mjekësor në Qendrën Emergjente. QKUK kishte bërë me dije më 25 gusht se gjendja e tij mbetej e rëndë.

Dy ditë më vonë, 26-vjeçari ndërroi jetë si pasojë e plagëve të marra, duke e çuar në dy numrin e viktimave të kësaj tragjedie familjare.