Zjarri që ka përfshirë masivin pyjor me dushqe në fshatin Madhesh të Shkopetit është përhapur në një sipërfaqe të konsiderueshme, pavarësisht ndërhyrjes së forcave nga toka dhe ajri.

Vatra e zjarrit, e cila u përball me ndërhyrje edhe gjatë ditës së djeshme, është zgjeruar duke përfshirë edhe zonat e Trodhënit dhe Lundrës, ndërsa flakët po avancojnë në drejtim të vargmalit të Skënderbeut.

Situata mbetet kritike për shkak të terrenit tepër të thyer, mungesës së rrugëve për aksesin e mjeteve zjarrfikëse dhe erës së fortë, që favorizon përhapjen e flakëve.

Ndërkohë, vatra aktive raportohen edhe në Sllatinë të Dibrës, Vajkal dhe Qafë Helmes të Bulqizës.

Forcat në terren vijojnë operacionin tokësor për izolimin dhe vënien nën kontroll të zjarreve, ndërsa kushtet e vështira të terrenit dhe moti po e komplikojnë ndërhyrjen.