Deputetja e Partisë së Lirisë, Erisa Xhixho, ka reaguar për problematikën e furnizimit me ujë në Tiranë, duke ngritur shqetësimin për mungesën e ujit në disa zona të kryeqytetit.

Përmes një postimi në Facebook, Xhixho shprehet se qytetarët po përballen me vështirësi për të siguruar ujin e nevojshëm, duke u detyruar ta blejnë me shishe ose të presin botet që furnizojnë lagjet.

Deputetja e lidh situatën me gjendjen e rrjetit të ujësjellësit dhe investimet në infrastrukturë, ndërsa ngre disa pikëpyetje mbi mënyrën se si janë përdorur paratë e qytetarëve.

“Ku janë investimet për rrjetin? Ku shkojnë paratë e qytetarëve? Pse Tirana ende nuk ka furnizim me ujë 24 orë?”, është në thelb shqetësimi i ngritur prej saj.

Sipas Xhixhos, qytetarët po përballen edhe me një kosto shtesë, pasi krahas pagesës së faturës së ujit dhe taksave, duhet të sigurojnë ujë për mbushjen e bidonëve dhe depozitave.

Ajo e ka cilësuar situatën si një problem të administrimit publik, duke vënë në kontrast zhvillimin urban të kryeqytetit me mungesën e një shërbimi bazë si furnizimi i rregullt me ujë.

Në fund të reagimit të saj, Xhixho e përmbledh kritikën me një mesazh të drejtpërdrejtë:

“Tirana meriton ujë 24 orë, jo bote 24 orë!”