Një sasi e konsiderueshme kokaine është sekuestruar në Portin e Durrësit, në kuadër të operacionit policor të koduar “Anchor 3”.

Policia ka sekuestruar 41 kilogramë e 350 gramë kokainë, me një vlerë tregu që përllogaritet rreth 2 milionë euro.

Lënda narkotike u zbulua gjatë kontrollit të imtësishëm të një kontejneri me origjinë nga Brazili, i cili, sipas dokumentacionit shoqërues, transportonte mish pule.

Gjatë kontrollit, shërbimet e Policisë kanë konstatuar në kapakët e jashtëm të kontejnerit 37 paketime me lëndë të dyshuar narkotike kokainë.

Operacioni është zhvilluar nga Sektori për Hetimin e Narkotikëve i DVP Durrës, në bashkëpunim me Drejtorinë Vendore për Kufirin dhe Migracionin Durrës dhe strukturat doganore të Portit të Durrësit.

Brenda një muaji, 3 raste në Portin e Durrësit

Sipas Policisë, ky është rasti i tretë i tentativës për futjen e lëndëve narkotike në Shqipëri përmes Portit të Durrësit brenda një muaji.

Strukturat hetimore vijojnë punën për dokumentimin e plotë ligjor të rastit, përcaktimin e origjinës dhe destinacionit të kokainës, si dhe identifikimin dhe kapjen e personave të dyshuar të përfshirë në këtë veprimtari kriminale.

Materialet procedurale i janë referuar Prokurorisë për veprime të mëtejshme.

Njoftimi i Policisë:

“Port, Durrës/ Goditet një rast i trafikimit të kokainës nga Brazili drejt Shqipërisë.

Brenda një muaji goditen 3 raste të tentativës për të futur lëndë narkotike në Shqipëri, nëpërmjet Portit të Durrësit.

Në kuadër të operacionit policor të koduar ‘Anchor 3’, sekuestrohen 41 kg e 350 gramë kokainë, me vlerë tregu rreth 2 milionë euro.”