Kontrollet e kryera në IEVP Peqin dhe IEVP Fier kanë çuar në zbulimin e dy rasteve të mbajtjes së celularëve nga të burgosur. Si rezultat, një i burgosur është arrestuar në flagrancë në Peqin, ndërsa disa të tjerë dhe dy punonjës policie janë proceduar penalisht.

Kontrollet janë kryer nga Agjencia e Mbikëqyrjes në Sistemin e Ekzekutimit të Vendimeve Penale (AMSEVP), në bashkëpunim me DPB, në kuadër të kontrolleve të ushtruara në disa institucione të ekzekutimit të vendimeve penale.

Peqin, një i burgosur kapet në flagrancë

Gjatë kontrollit në sendet personale të të burgosurit F. Ç. në IEVP Peqin, është konstatuar një aparat celular.

Pas kryerjes së veprimeve të para procedurale, AMSEVP ka bërë arrestimin në flagrancë të tij për veprën penale “Futja ose mbajtja e sendeve të ndaluara në institucionin e ekzekutimit të vendimeve penale”, të parashikuar nga neni 324/a/2 i Kodit Penal.

Ndërkohë, janë proceduar në gjendje të lirë edhe të burgosurit M. H., L. Gj., I. L. dhe F. A., për veprën penale “Moskallëzimi i krimit”, sipas nenit 300 të Kodit Penal.

Për të njëjtin rast janë proceduar në gjendje të lirë edhe Sh. K. dhe E. J., me detyrë punonjës policie në IEVP Peqin, për veprën penale “Shpërdorimi i detyrës”, të parashikuar nga neni 248 i Kodit Penal.

Fier, celular në dhomën e të burgosurit

Një tjetër aparat celular është konstatuar gjatë kontrollit në ambientet e dhomës së të burgosurit R. K. në IEVP Fier.

Në përfundim të veprimeve të para procedurale, R. K. është proceduar në gjendje të lirë për veprën penale “Futja ose mbajtja e sendeve të ndaluara në institucionin e ekzekutimit të vendimeve penale”, të parashikuar nga neni 324/a i Kodit Penal.

Gjithashtu, është proceduar në gjendje të lirë edhe i burgosuri E. B., për veprën penale “Moskallëzimi i krimit”, sipas nenit 300 të Kodit Penal.

Materialet procedurale do t’u dërgohen për veprime të mëtejshme Prokurorive pranë Gjykatave të Shkallës së Parë të Juridiksionit të Përgjithshëm Elbasan dhe Fier, sipas kompetencës.