Një grua nga Minnesota është bërë papritur virale në rrjetet sociale, jo vetëm për shkak të arrestimit të saj për vjedhje, por mbi të gjitha për ngjashmërinë e habitshme që përdoruesit kanë vënë re mes saj dhe yllit të muzikës dhe kinemasë, Jennifer Lopez.

Bëhet fjalë për Cyrena Anne Quast, 35 vjeçe, nga Saint Cloud, Minnesota, e cila u arrestua më 30 gusht në Monticello, pasi dyshohet se kishte vjedhur dy paketime të dyfishta me bateri për vegla elektrike, me vlerë rreth 580 dollarë.

Sipas kallëzimit penal, një punonjës i dyqanit e kishte njohur Quast nga një vjedhje e dyshuar dy ditë më herët dhe njoftoi policinë.

Autoritetet thanë se Quast pranoi se kishte marrë bateritë dhe u regjistrua nën akuzën për vjedhje të kategorisë “gross misdemeanor”. Ajo u lirua një ditë pas arrestimit.

Megjithatë, ajo që e bëri rastin të shpërthejë në internet ishte fotografia e saj e arrestimit. Në imazhin e publikuar nga Zyra e Sherifit të Qarkut Wright, shumë përdorues vunë re ngjashmëri të forta me Jennifer Lopez.

“Për një moment mendova se ishte J.Lo, hahaha”, shkroi një përdorues.

Një tjetër komentoi:

“Ka ndodhur një defekt në Matrix.”

Komentet u kthyen shpejt në meme, ndërsa shumë përdorues iu referuan edhe hitit të famshëm të Lopez, “Jenny from the Block”.

“Në burg njihet si Jenny from D-Block!”, shkroi me shaka një përdorues.

Një tjetër vijoi me të njëjtin humor:

“Jenny paska ecur shumë nëpër bllok.”

Madje, një komentues i kërkoi në mënyrë humoristike Jennifer Lopez-it që të shkojë ta “marrë motrën” dhe të bëjë një test ADN-je me të.

Kështu, një rast arrestimi në Minnesota u shndërrua në një valë memesh në rrjetet sociale, me përdoruesit që u përqendruan më shumë te ngjashmëria e 35-vjeçares me J.Lo sesa te vetë akuzat ndaj saj.