Gjovalin Lazri, 36 vjeç, është qëlluar me dy plumba, një në shpatullën e djathtë dhe një në qafë. I riu ishte pjesë e grupit të personave që kishin hyrë në fermën e Roberto Mollo-s në Baldissero d’Alba, në Itali.

Autopsia, e cila pritet të kryhet sot, synon të përcaktojë nëse, ashtu siç dyshojnë hetuesit, Roberto Mollo ka qëlluar ndaj Lazrit në momentin kur ai dhe bashkëpunëtorët e tij ishin tashmë duke u larguar nga ferma.

Konfirmime të mëtejshme pritet të dalin edhe nga ekspertiza balistike. Sipas të dhënave të bëra publike, pronari i banesës, Roberto Mollo, ka hapur zjarr nga ballkoni i katit të parë, nga një distancë prej të paktën 30 metrash.

Autopsia dhe ekspertiza balistike në qendër të hetimit

Autopsia dhe ekspertiza balistike pritet të jenë në qendër të betejës ligjore që do të zhvillohet lidhur me ngjarjen.

Për këtë arsye, procedurat po kryhen në prani të ekspertëve të caktuar nga mbrojtja e Roberto Mollo-s: mjeku ligjor Lorenzo Varetto dhe eksperti Ruggero Pettinelli. Ndërkohë, familjarët e viktimës kanë hequr dorë nga emërimi i ekspertëve të tyre.

Partnerja e Gjovalin Lazrit ka deklaruar përmes avokates së saj:

“Djali im nuk ka më baba dhe unë jam e shkatërruar nga dhimbja. Dua të dalë e gjithë e vërteta dhe kërkoj vetëm që drejtësia të bëjë punën e saj.”

Ajo nuk ka dashur të komentojë detajet e hetimit, por ka theksuar:

“Dëgjojmë dhe lexojmë shumë gjëra, por dua të them se nuk ka njerëz të mirë dhe të këqij. Njerëz që meritojnë të vdesin apo të tjerë që bëjnë mirë kur qëllojnë me armë”.

Deklaratat janë përcjellë përmes avokates së saj, Roberta Sisimbro.

“Kemi besim të plotë te puna e Prokurorisë dhe te zbatimi i ligjit. Jetojmë në një shtet të së drejtës, me Kushtetutë dhe ligje që duhen respektuar”, tha avokatja.

E shkuara e viktimës

Partnerja dhe djali i Lazrit jetojnë në Torino, ku ai kishte marrë në administrim një lokal në periferi të qytetit. Partnerja e tij punon si tatuazhe. Prej disa ditësh, të dy aktivitetet janë të mbyllura.

Sipas të dhënave të bëra publike, 36-vjeçari kishte precedentë të ndryshëm penalë, përfshirë edhe grabitje. Në vitin 2013, ai kishte hyrë në një vilë në provincën e Asti-t, nga ku kishte vjedhur para dhe sende me vlerë.

Miqtë e tij thonë se kohët e fundit ai kishte ndryshuar jetën, megjithëse dyshohet se po përballej me vështirësi ekonomike. Për këtë arsye, hetuesit nuk përjashtojnë mundësinë që ai t’u ishte bashkuar sërish personave të njohur për vjedhje dhe grabitje, për të siguruar para të shpejta.

Bëhet fjalë për grupe të njohura për autoritetet, të cilat lëvizin nga një zonë në tjetrën për të kryer vjedhje. Hetuesit besojnë se mund të arrijnë t’i identifikojnë përmes metodave tradicionale hetimore, pasi kamerat e sigurisë në zonën e Baldissero d’Alba janë të pakta dhe të vjetra.

Cili ishte objektivi i grupit?

Sipas karabinierëve, grupi ishte i interesuar për vegla pune dhe materiale ndërtimi të grumbulluara në oborr, të cilat më pas dyshohet se do t’i rishisnin.

Hetuesit dyshojnë se hajdutët mendonin se godina ishte e pabanuar. Ata mund të kenë hyrë fillimisht në oborr për të kryer një vëzhgim paraprak, përpara se të ktheheshin me një furgon ose kamion për të marrë materialet.

Në rrugicën që të çon te ferma nuk janë gjetur gjurmë gomash.

Megjithatë, avokati i Roberto Mollo-s ka paraqitur një version tjetër. Sipas tij, personat që hynë në pronë synonin të futeshin në banesë dhe ishin të armatosur me kaçavida.

“Këtë e tregojnë fakti që kishin elektrikë dore dhe doreza. Roberto po flinte në katin e sipërm dhe u frikësua për sigurinë e tij”, deklaroi avokati Pier Mario.