Një vajzë 10-vjeçare me origjinë shqiptare është plagosur gjatë një sulmi me armë ndaj një lokali në lagjen Agios Panteleimonas të Athinës. Lokali rezulton në pronësi të 30-vjeçarit Denis Luli.

Pas ngjarjes, policia greke ka gjetur në Aspropirgo një automjet të djegur, brenda të cilit ndodhej edhe një kallashnikov. Sipas hetimeve paraprake, policia dyshon se shënjestër e sulmit ishte Denis Luli, i cili rezulton të ketë precedentë penalë.

Luli ishte arrestuar në vitin 2015 në një parcelë të mbjellë me marijuanë. Gjatë aksionit, sipas të dhënave të bëra publike, ai kishte hapur zjarr ndaj forcave të policisë greke. Për këtë ngjarje ai u dënua dhe në vitin 2021 u lirua me kusht nga burgu i Malandrinos.

Dyshimet për porositësin

Lidhur me sulmin e fundit, policia greke dyshon se ai mund të jetë porositur nga 49-vjeçari nga Berati, Klodian Lekocaj, i njohur gjerësisht si Klod Cara.

Klodian Gjon Lekocaj, alias Klod Cara, është përmendur ndër vite në hetime dhe raportime të mediave greke për lidhje të dyshuara me grupe kriminale shqiptare dhe greke. Etiketimi i tij si kreu i së ashtuquajturës “Mafia e Burgjeve” është bërë nga media greke, ndërsa vetë Lekocaj, në daljet e tij publike, i ka mohuar akuzat dhe është shprehur se është “i varfër”, “i pafajshëm” dhe “i përdorur”.

Sipas të dhënave të përmendura në hetimet dhe dëshmitë e policisë greke, emri i Lekocajt është lidhur me disa ngjarje të rënda kriminale dhe me dyshime për porositje të vrasjeve dhe atentateve.

Një prej rasteve të përmendura është ai i 14 shtatorit 2022, kur policia greke arrestoi në Athinë dy shqiptarët Viktor Çala, 39 vjeç, dhe Andi Beqiri, 23 vjeç. Në automjetin e tyre u gjetën të fshehura dy kallashnikovë dhe një thikë, ndërsa në banesë një pistoletë.

Hetimi i policisë zbuloi se Çala dyshohej si autor i vrasjes së një shtetasi grek dhe tentativës së vrasjes së një shqiptari, ngjarje të ndodhura në korrik të vitit 2022. Për vrasjen e shtetasit grek, ai deklaroi se ishte urdhëruar nga Klodian Lekocaj, për shkak të prishjes së pazareve të drogës.

Emri i Lekocajt është përmendur gjithashtu në hetime të tjera, ku dyshohet për përfshirje në urdhërimin e vrasjeve të avokatit grek Mixalis Zafiropoulos, të të burgosurit Arbër Bako dhe të të burgosurit Bardhyl Tusha, si dhe në një tentativë vrasjeje ndaj një shtetasi pakistanez, gjobvënie dhe ndihmë në arratisjen e të burgosurve.

Nga vjedhjet te akuzat për vrasje dhe trafik droge

Lekocaj është arrestuar për herë të parë në vitin 1997 për vjedhje. Në vitin 2003, ai u arratis nga burgu i Volosit.

Në vitin 2005, në Agio Pantaleimona, ai dyshohet se plagosi me armë zjarri në bark një shtetas shqiptar. Një vit më vonë, në të njëjtën zonë, bashkë me dy shqiptarë të tjerë, dyshohet se plagosi me thikë një bashkëkombës.

Në vitin 2013 u arrestua për trafik droge dhe vjedhje dhe u dërgua në burgun e Korfuzit. Pas marrjes së një lejeje, ai u arratis në vitin 2014. Disa ditë më vonë, sipas të dhënave të hetimit, bashkë me Arbër Bakon mori pjesë në një tentativë grabitjeje, ku u plagos një shtetas egjiptian.

Më 31 tetor 2014, Lekocaj, bashkë me Arbër Bako, Olti Dulce dhe një shtetas polak, dyshohet se kreu një vrasje në zonën e Metaksurgios.

Në nëntor të vitit 2014, Lekocaj u arrestua në Sepolia, në shoqërinë e Dhimo Mëçit, një shtetas shqiptar i përmendur në disa raste vrasjesh me pagesë në Greqi. Arrestimi erdhi pas ngjarjes së Mikrolimanos, ku Arbër Bako kishte plagosur me kallashnikov disa klientë të një lokali.

Akuzat e viteve të fundit

Në vitin 2019, Lekocaj u akuzua se kishte rekrutuar një vrasës me pagesë nga Shqipëria për të ekzekutuar një shtetas pakistanez.

Në mars 2023, ndaj tij u ngrit akuzë për gjobvënie ndaj një biznesmeni grek, në shumën 100 mijë euro.

Në prill 2025, Lekocaj u akuzua për porositjen e atentatit ndaj shqiptarëve Kristjanis Stefa dhe Florian Bajraktari, ngjarje e ndodhur më 23 shtator 2024.

Në maj 2025, sipas autoriteteve greke, Lekocaj mori peng dy gardianë të burgut të Koridhalosit duke përdorur një thikë dhe u mori çelësat, radiot dhe telefonat celularë. Më pas ai tentoi të lëvizte drejt një sektori tjetër të burgut bashkë me shtatë shtetas egjiptianë. Ndërhyrja e forcave të tjera bëri të mundur neutralizimin e të burgosurve.

Disa ditë më vonë, gjatë kontrollit në qelinë e Lekocajt dhe në qelitë e disa të dënuarve të tjerë, policia gjeti sende të paligjshme, përfshirë celularë, thika dhe kokainë.

Në shkurt 2026, policia greke zbuloi, sipas hetimeve, një rrjet për futjen e drogës në burg dhe arrestoi Lekocajn bashkë me tre persona të tjerë.

Po në shkurt, Lekocaj mori përsipër autorësinë e plagosjes në burg të 46-vjeçarit Dhimo Mëçi. Ai deklaroi se kishte urdhëruar një autor grek për të kryer sulmin.

Në prill 2026, policia greke arrestoi në Agio Pantaleimona të Athinës dy të rinj shqiptarë të dyshuar për shpërndarje droge dhe sekuestroi lëndë narkotike. Sipas hetimeve, pas tyre dyshohej se qëndronte Lekocaj.

Po atë muaj, në Selanik u arrestuan tre persona, dy shqiptarë dhe një grek, të dyshuar për gjobvënie ndaj një biznesmeni. Sipas policisë greke, ata kishin marrë urdhra nga Lekocaj. Njërit prej të arrestuarve iu sekuestrua edhe një pistoletë.

Ndërkohë, në shtator 2026, dy lokale në qendër të Athinës u sulmuan me granata, në një interval prej rreth 30 minutash. Grupi hetimor dyshon se pas këtyre ngjarjeve mund të fshihet Klodian Lekocaj.

Në lidhje me sulmin e fundit ndaj lokalit në Agios Panteleimonas, hetimet vijojnë për të përcaktuar autorët, motivin dhe nëse ekziston një lidhje e drejtpërdrejtë me personat e përmendur në hetimet e mëparshme. Akuzat dhe dyshimet e përmendura ndaj Lekocajt dhe personave të tjerë janë pjesë e hetimeve dhe procedimeve të raportuara nga autoritetet greke dhe nuk përbëjnë në vetvete një vendim përfundimtar gjyqësor.