At Nikolla Xhufka ka qenë i ftuar në emisionin “She’s On Air”, ku është përballur me pyetje pikante nga moderatoret, duke folur hapur edhe për tundimet seksuale, dëshirat dhe virgjërinë.

I pyetur se kur ka qenë hera e fundit që një tundim seksual e ka vënë në vështirësi, At Nikolla Xhufka tha se tundimet janë të pranishme çdo ditë, duke iu referuar edhe pranisë së tij në studio.

“Çdo ditë kemi tundime, ja dhe tani tundim është për mua që rri me këto vajza të bukura këtu. Jeni të gjitha shumë të mira, Zoti iu bekoftë. Ka disa lloj tundimesh, jo vetëm tundim seksual por edhe ai i të parit. Ta mendosh është mëkat e jo më ta bësh”, u shpreh ai.

Më tej, ai u pyet nëse është normale që një prift të ketë dëshira seksuale.

“Patjetër, prandaj dhe kisha ka vendosur dy rrugë, flas kisha Ortodokse, martesën dhe murgjirinë. Kryepeshkopët nuk martohen që të mos lënë trashëgimtarë”, deklaroi At Nikolla Xhufka.

I pyetur se çfarë ndodh me priftërinjtë nëse kanë dëshira seksuale, ai u përgjigj:

“Duhet të japin dorëheqjen nga posti që kanë dhe të bëhen priftërinj.”

Në vijim, At Nikolla Xhufka u pyet edhe për një deklaratë të mëparshme të tij, ku kishte thënë se ishte i virgjër dhe nëse kjo vijonte të ishte ende e vërtetë.

“Po patjetër se unë nuk jam martuar. Bibla ose Ungjilli siç i themi ne thotë ‘mos e përdhosni shtratin tuaj bashkëshortor’. E për njerëzit që janë fetar, si mysliman apo të krishterë, virgjëria para martese është kryesore, thelbësore. Nëse njëri në çift nuk është i virgjër nuk kryhet martesa, ka qenë më përpara kështu. Se tani kisha i marton, nuk i pyet”, u shpreh ai.