Rusia mund të ndërmarrë sulme të kufizuara ndaj vendeve anëtare të NATO-s, ndërsa tensionet me Evropën vijojnë të rriten. Paralajmërimi vjen nga shërbimi danez i inteligjencës ushtarake, në raportin e publikuar më 24 shtator.

Sipas “Corriere della Sera”, një pushtim i plotë i një vendi të NATO-s mbetet shumë i pamundur, por rreziku për incidente të kufizuara ushtarake vlerësohet se është në rritje.

Inteligjenca daneze vlerëson se Moska mund të tentojë të testojë reagimin e Aleancës përmes sulmeve ndaj infrastrukturës, akteve të sabotimit ose operacioneve të tjera që mund të shkaktojnë përçarje brenda NATO-s.

Sipas vlerësimit të inteligjencës daneze, këto veprime do të mund të shërbenin për të matur gatishmërinë dhe reagimin e vendeve të Aleancës, pa kaluar domosdoshmërisht në një konflikt të drejtpërdrejtë dhe të gjerë me NATO-n.