Kryetari i Partisë Demokratike, Lulzim Basha, gjatë fjalës së tij nga foltorja e Parlamentit ditën e sotme bëri një apel publik mbi pushtetin e tretë, atë të drejtësisë. Basha kërkoi nga ana gjyqtarëve dhe prokurorëve që të veprojnë në lidhje me korrupsionin, i cili po cënon zhvillimin ekonomik të vendit.

Sipas kryedemokratit shqiptarët po e presin me kohë veprimin e drejtësisë dhe tashmë gjyqësori nuk duhet të vonojë për hetimin dhe arrestimin e personave të përfshirë në afera korruptive.

Basha theksoi se denoncimet e PD-së mund të mbeten vetëm në kuadrin e deklaratave politike, ndaj duhet veprim nga ana e pushtetit të tretë.

“Përpara se ta mbyll kam një thirrje për pushtetin e tretë, zonjat dhe zotërinjtë e drejtësisë. Në mungesë të ndëshkueshmërisë ajo që do të mbetet nga denooncimet tona janë debatet politike. Propaganda e regjimit do mundet t‘i shpërfaqë debatet tona si llafe apo propagandë.

E vërteta është aty jashtë, te çmimet që rriten, te bizneset që mbyllen, te investimet e huaja që nuk vijnë dhe te korrupsioni që ha buxhetin e shtetit dhe shkatërron ekonominë.

Zonja dhe zotërinj u bë kohë që shqiptarët po ju presin, mos bëni që vonesa juaj të bëhet penguese për demokracinë dhe interesat e qytetarëve. Mos u bëni bashkëpunim në krim, por ndëshkojeni atë në të gjitha nivelet.

Lëreni tapetin e kuq për artistët dhe mos kaloni aty krahë për krahë me subjektet e drejtësisë, me ata që në vend të gotave të shampanjës duhet tu trokisnit prangat në kyçe”, tha Basha.