Mbi 5 milionë njerëz në të gjithë botën kanë humbur jetën si pasojë e COVID-19-ës.

Sipas të dhënave të bërë publike nga Universiteti Johns Hopkins, numri i viktimave ka arritur në 5, 001, 817 persona.Ndërkohë numri i infeksioneve ka arritur në 246, 811, 481.

Pandemia Covid vijon të mbetet shqetësuese, në shumë vende janë shënuar rritje të rasteve me Covid si pasojë edhe e përhapjes së varianteve të reja.

Vetëm disa muaj më parë, në qershor, numri i të vdekurve si pasojë e pandemisë së koronavirusit arriti në 4 milionë.

Shifra e re vjen ndërsa disa vende vazhdojnë të hasin vështirësi në sigurimin e vaksinave, në një kohë kur një pjesë ka nisur të vaksinojë popullsinë me dozën përforcuese.

Së fundmi OBSH ka bërë thirrje për krijimin e një mekanizmi të ri financimi në mënyrë që vendet të jenë të përgatitura në rast të shpërthimit të pandemive të reja.

Në letrën e OBSH-së thuhej se pabarazia në shpërndarjen e vaksinave po merr çdo ditë jetë njerëzish dhe vazhdon të rrezikojë të gjithë.

“Historia dhe shkenca e bëjnë të qartë: veprimi i koordinuar me qasje të barabartë në burimet e shëndetit publik është mënyra e vetme për t’u përballuar me plagë globale të shëndetit publik si COVID-19. Ne kemi nevojë për një shtytje të fortë e kolektive për të shpëtuar jetë, për të zvogëluar vuajtjet, si dhe për të siguruar një rimëkëmbje të qëndrueshme globale”, thuhet më tej në deklaratën e OBSH-së.