KELMENT BAÇI/ Buxheti i shtetit ka shpenzuar plot 14.3 milionë lekë për 127 deputetët e Kuvendit të Shqipërisë për muajin tetor vetëm për përfitimet shtesë gjatë ushtrimit të detyrës së tyre, përveç pagës neto.

Shifra e kripur është përllogaritur vetëm duke u bazuar në shpenzimet për karburant, fatura telefoni, qira banese, dieta, pagesa për hotel dhe rinovim pasaporte diplomatike. Ajo që bie në sy është se gjatë muajit tetor plot 37 deputetë kanë përfituar një pagë të majme prej 75 mijë lekësh, vetëm për dieta.

Këtë përfitim nuk kanë pranuar ta marrin 13 deputetë, mes të cilëve kryetari i PD-së, Lulzim Basha, Sali Berisha, kryetarja e LSI-së, Monika Kryemadhi, kreu i Grupit të PS-së, Taulant Balla, dy biznesmenët Agron Shehaj dhe Agron Çela, si dhe 7 të tjerë. Me shifra nga 18 mijë lekë që ka përfituar deputeti i PD-së Edmond Spaho dhe 25 mijë Tritan Shehu, mbi 50 deputetë kanë përfituar të njëjtën shifër, prej 37 mijë lekësh, pavarësisht angazhimit të tyre në terren apo jo. Në total, vetëm për dietat e deputetëve, në muajin tetor janë shpenzuar plot 6.37 milionë lekë.

Asnjë deputet i Kuvendit nuk e ka refuzuar pagesën për karburantin, duke përfituar një shumë që varion nga 30 mijë lekë deri në 40 mijë lekë, sipas largësisë së qarkut që përfaqësojnë, që në total arrin një shifër prej 4.43 milionë lekësh. Edhe për sa i përket pagesës për telefonat, asnjë deputet nuk e ka refuzuar atë, madje ata që janë drejtues të komisioneve parlamentare kanë përfituar edhe pagesë shtesë.

17 mijë lekë dhe 20 mijë lekë janë dy shumat që janë paguar zakonisht deputetët për komunikimet, mesazhet dhe lundrimin e tyre në internet, ndërsa 7 prej tyre kanë përfituar një shtesë prej 21 mijë lekësh dhe deputetja Klotilda Bushka që ka përfituar 18 mijë lekë. Në këtë muaj vetëm 8 deputetë kanë marrë pagesë për qiranë e shtëpisë që kanë marrë në kryeqytet.

Pagesa më e madhe për qiranë e shtëpisë së një deputeti është 35 mijë lekë, që e kanë përfituar 4 deputetë dhe më e ulëta 9.3 mijë lekë, që e ka marrë Nusret Avdulla, duke e çuar në total 197 mijë lekë. 11 deputetë të Kuvendit kanë përfituar nga 7.5 mijë lekë për rimbursimin e pasaportës diplomatike me një fond në total prej 82.5 mijë lekësh.