Ish-deputetja e LDK në Kosovë, Melihate Tërmkolli e pranishme në protestën e ish kryeministrit Berisha në Tiranë, e quajti një thikë pas shpine për Kosovën, projektin e ‘Ballkanit të hapur’.
“Një thikë pas shpi Kosovës e shqiptarëve. Sot ne, këtu dhe gjithnjë do ta kundërshtojmë me gjithë fuqinë tonë, dhe nuk është e vogël. Fuqia e popullit është e madhe”, u shpreh ajo.
“Do ta kundërshtoj në vazhdimësi këtë projekt që do të thotë një Jugosllavi e Re dhe është përpjekja e fundit e Vuçiçit, që realizoi planet nga Garashanini e deri te Millosheviçi. Kjo nuk do të ndodhë, është kalaja Kosovë dhe janë shqiptarët këtu në Shqipëri dhe kudo që janë. A e dini ju që Vuçiçi është ndër kritikuesit më të mëdhenj të Millosheviçit, jo pse bëri gjenocidin, por përse nuk e përfundoi punët për t’i hedhur shqiptarët në det dhe për ta marrë Kosovën.
Do sosorsianë të rinj kam dëgjuar të thonë, që nëse Serbia e njeh Kosovën do ta pranojmë Ballkanin e Hapur. Kurrë dhe asnjëherë nuk do ta pranojmë. Rama duhet ta shpallë nul këtë pakt. Nuk e duron dot Kosova, nuk e duron dot Shqipëria këtë pakt. Ne shqiptarët kemi vetëm një pakt dhe një lidhje me SHBA-të dhe Perëndimin. Krejt ata politikanë që janë kombëtarë s’ka se si të mos jenë pro-amerikanë. Shtiren si pro amerikanë ata që ngrihen kundër kombit të vet dhe popullit të vet. Amerika është me popullin shqiptar, ndërsa shqiptarët janë me Sali Berishën”, tha Tërmkolli.
