Pas vdekjes së një vajze 3-vjeçare në qytetin e Elbasanit, Policia lokale ka nisur hetimet ndaj mjekut roje, duke e akuzuar atë për “Neglizhencë në trajtimin mjekësor”.

Bëhet fjalë për mjekun Gentian Alla, i cili ka qenë mjek roje ditën kur prindërit çuan në Spitalin Pediatrik të Elbasanit vajzën e vogël, e cila kishte qëndruar në shtëpi e sëmurë për ditë të tëra.

Familjarët e vogëlushes së ndjerë nuk kanë bërë denoncim në Polici ndaj mjekëve, ndërsa kanë deklaruar publikisht se ndaj 3-vjeçares stafi mjekësor kishte thënë se ishte prekur nga virozat e stinës. Megjithatë, Policia lokale ka nisur hetim ndaj mjekut roje që ishte në spital ditën kur ndodhi ngjarja e rëndë.

“Nga specialistët për Hetimin e Krimit në Komisariatin e Policisë Elbasan u procedua penalisht për veprën penale ‘Neglizhenca në trajtimin mjekësor’, shtetasi G. A., 47 vjeç, banues në Elbasan, me detyrë mjek në Spitalin Rajonal Elbasan, pasi ditën e djeshme (19 janar) është dërguar në spital në gjendje të rëndë për jetën, një shtetase e mitur 3 vjeçe, e cila pas disa orësh dyshohet se ka ndërruar jetë për shkak të neglizhencës në trajtimin mjekësor”, thuhet në reagimin e Policisë së Elbasanit.

Materialet hetimore paraprake në ngarkim të mjekut i kaluan Prokurorisë së Elbasanit për veprime të mëtejshme.

Hetuesit po përqendrohen te zbatimi i protokollit mjekësor ndaj mjekut të përgjithshëm. Mësohet se 3-vjeçarja ka humbur jetën për shkak të pneumonisë bilaterale, insuficiencës respiratore akute dhe insuficiencës kardiake.

Burimet bëjnë me dije se është marrë në pyetje edhe mjekja që ka kryer vizitën e parë ndaj vajzës. Do të jetë ekspertiza mjekoligjore ajo që do të sqarojë motivet e humbjes së jetës së të miturës.

NGJARJA

Ngjarja e rëndë u regjistrua mëngjesin e së mërkurës në Spitalin e Elbasanit, ku 3- vjeçarja me inicialet A. I. humbi jetën në rrethana ende të paqarta, ndërsa mjekët u kishin thënë prindërve të viktimës se ajo ishte me virozë.

“Më datë 19.01.2022, në orët e para të mëngjesit është dërguar në Spitalin e Elbasanit, në gjendje të rëndë për jetën, fëmija i mitur A. I., 3 vjeç, që pas disa orësh ka humbur jetën. Grupi hetimor ka kryer veprimet e para hetimore në vendngjarje dhe pritet ekspertiza mjekoligjore për përcaktimin e shkakut të humbjes së jetës”, sqaroi Policia e Elbasanit.

Do të jetë analiza mjekoligjore ajo që do të përcaktojë shkaqet e vdekjes së fëmijës, rezultatet e së cilës nuk kanë dalë ende. Babai i fëmijës deklaroi se vajza e tij kishte nëntë ditë e sëmurë dhe mjekët, pasi i kanë dhënë ilaçet për virozë, e kanë dërguar në shtëpi.

Ai deklaroi për mediat se nuk e dinte shkakun e saktë të humbjes së jetës së vogëlushes, duke theksuar se një ditë më herët kishte pasur nxirje të buzëve.

Burri deklaron gjithashtu se mjekët i kishin dhënë ilaçe për kurimin e së miturës tri ditë para vdekjes, por shton se gjendja e saj ishte përkeqësuar.

“Pa u sëmurë asnjëherë. U sëmur para një jave, e prura për vizitë para dy-tri ditëve para se të vdiste, doktori tha virozë. Më dha një qese me ilaçe, e çova në shtëpi. Dje u bë goca keq pasi iu nxi buza. E solla në spital, mori 2 bidonë serum dhe goca vdiq. Kishte 8-9 ditë që ishte sëmurë. Nuk ishte në gjendje të rëndë. Pasi u bë keq, e solla për vizitë. Mjekët më thanë se është virozë. Se si iku kjo gocë, unë nuk e di. Nuk na kanë dhënë asnjë shkak për vdekjen”, ka deklaruar babai i vajzës.

Ky është rasti i dytë kur një fëmijë 3-vjeçar humb jetën, pas vdekjes së një djali në mënyrë ende të pasqaruar mirë në qytetin e Fierit. Ngjarja e rëndë u regjistrua më 7 janar në kopshtin ku shkonte fëmija