Kryeministri Edi Rama iu është përgjigjur me ironi akuzave të Partisë Demokratike se ka udhëtuar me një charter luksoz, i cili vetëm karburant do 120 mijë euro.

Në një video-mesazh në “Facebook” Rama thekson se ka udhëtuar drejt Mynihut me një biletë ekonomike 345 euro, ku shoqërohej nga bashkëshortja dhe djali i tij i vogël.

“Fakti që kam dalë në fotografi, pranë me resortin legjendar, s’do të thotë se kam qëndruar aty, unë kam qëndruar me familjen në Mynih. Kam kaluar një orë ne zonën e liqenit me gazetaren, për rubrikën e saj të njohur me personalitete, të ftuara për një bashkëbisedim në natyrë. Kështu që në vend që të shkoni te llixhat e carëve dhe perandoreshave, gjeni një përkthyes dhe mos shikoni vetëm fotografitë.”, tha ai.

Pampuri: Rama tha se i kishte shpenzuar paratë për hallin e tij, për të dhënë një intervistë…

Rama: Jo, unë nuk njoftova këtë dje. Kush më dëgjoi e deshi të dëgjove, dëgjoi qartë se kam udhëtuar në Mynih me një biletë ekonomike 345 euro, me familjen, me gruan dhe djalin e vogël.

Pampuri: A ka udhëtuar ditët e fundit Rama në Suedi, kush i ka paguar paratë e këtij udhëtimi?

Rama: Ç’lidhje ka udhëtim Suedi me intervistën në Mynih. Jo! Unë nuk kam udhëtuar në Suedi. Sidoqoftë, çështja e pagesës së këtij udhëtimi imagjinar s’duhet lënë pa u zbardhur, prandaj duhet pyetur urgjent ai që i uli 5004 delegatë imagjinarë në 1958 vendet reale në Pallatin e Kongreseve.

Pampuri: Rama ka shpenzuar 798.3 milionë euro nga paratë e shqiptarëve vetëm për fluturime…

Rama: 8 vite fluturime, herë 5 humbje, shumëzim për 7 dyer të blinduara, herë 7 brava, pjesëtim për 42 vare, bëjnë një teneqe të ndarë më dysh, që u duhet varur në qafë nga demokratët e arsyeshëm shqiptarë dy të marrëve që kanë marrë peng PD për arsye krejt personale.