Zëvendës ndihmës sekretar amerikan i shtetit njëherazi i dërguari special në DASH për Ballkanin Perëndimor Gabriel Escobar ka reaguar pas replikave mes ish-kryeministrit Sali Berisha dhe ambasadores së SHBA në vendin tonë Yuri Kim.

Në një deklaratë për Top Channel, Escobar shprehet se Yuri Kim është përfaqësuese personale e presidentit të SHBA. Ai thekson se DASH pret prej saj të vazhdojë zbatimin e politikave të SHBA.

“Jam i tronditur nga sulmet ndaj ambasadores tonë të SHBA në Tiranë. Ne e dimë se ofensiva e këtyre sulmeve nuk përfaqëson popullin shqiptar. Ambasadorja Kim është përfaqësuese personale e Presidentit të Shteteve të Bashkuara.

Siç edhe zëdhënësi Departamentit të Shtetit e bëri të qartë në Dhjetor ne presim prej saj të vazhduarit të shpjeguarit dhe zbatuarit të politikave të SHBA, përfshi ato të Presidentit Biden përfshi vendosmërinë që ne do të vendosim përpara përgjegjësisë ata të përfshirë në korrupsion e minojnë demokracinë”, ka thënë Escobar.

Ai ka deklaruar se pozicioni i SHBA në lidhje me personat e shpallur non grata mbetet i pandryshuar. “Pozicioni ynë në lidhje me të shpallurit NonGrata për korrupsion apo minojnë demokracinë është i qartë, i vendosu, i fortë dhe i pandryshuar”, është shprehur ai.

Kujtojmë se një ditë më parë Berisha e cilësoiYuri Kim gurvenatore kur u pyet në lidhje me qëndrimin e saj në raport me Enkelejd Alibajn të cilin e njohu si kryetar të komanduar të PD.