Presidenti i Serbisë Aleksandër Vuçiç ka folur në samitin e Ballkanit të Hapur, që është duke u mbajtur sot në Ohër të Maqedonisë.

Teksa iu referua zërave se Ballkani i Hapur është një nismë e Rusisë, pas deklaratës mbështetëse të Sergei Lavrov, Vuçiç tha se nisma është ideuar nga vendet e vetë Ballkanit.

Sipas Vuçiç kjo nismë i shërben ekonomisë së të gjitha vendeve që kanë pranuar të jenë pjesë e këtij bashkimi.

Fjala e Vuçiç:

Kjo është iniciativë e jona, iniciativë e njerëzve nga Ballkani, që mendojnë se mund ti zgjidhin vetë problemet e tyre. Ne nuk kemi probleme bilaterale të ndërsjellta, ne nuk kemi asnjë kërkesë ndaj askujt, përveçse të jemi miq dhe të punojmë së bashku.

Falenderojmë zotin Varheleyi, kjo është një iniciativë që nuk mund të ndalet, ne kërkojmë që të kemi sa më shumë pjestarë nga vendet e tjera, propozoj që takimi i ardhshëm të jetë në Serbinë jugore, që të formojmë grupe pune, për të diskutuar se si mund të ndihmojmë njëri tjetrin që të përballojmë dimrin. Janë të mirëseardhur në këto marrëveshje, edhe përfaqësuesit e Bosnjes, Prishtinës, Malit të zi dhe kështu me radhë.

Sot nënshkruam marrëveshjen për diplomat, të shohim se çfarë presin njerëzit nga ne, çfarë mund të bëjmë për turizmin dhe që njerëzit nga Serbia të shkojnë në Shqipëri, të vijnë për turizëm në Maqedoni, si dhe ne ti ftojmë miqtë tanë të vizitojnë vendet e bukura në Serbinë tonë të bukur. Unë jam krenar që kjo iniciativë, që mendonin se do të dështonte, po ecën përpara.

Nuk mund të na ndalojë askush, hapen apo jo negociatat varet nga të tjerët, ajo që varet nga ne është që të vendosim si do të jetojmë me fqinjët tanë. Ne presim që të ndihmojmë Shqipërinë dhe Maqedoninë në shuarjen e zjarreve, kam shumë entuziasëm dhe dëshira që të bëjmë gjëra të mëdha, Dritan, Zoran jeni të mirëseardhur, ju lutem nëse dëshironi urdhëroni, askush nuk do tju detyrojë që të bëheni pjesë e Ballkanit të Hapur.