Një deklaratë tronditëse, por edhe e neveritshme, vjen nga Rusia. Kryeredaktorja e lajmeve në një media ruse ka folur me “superlativa” për krizën e një zie buke globale të shkaktuar nga bllokada e grurit të Moskës.
Margarita Simonyan, kryeredaktore e kanalit të lajmeve në Rusi RT, i bëri komentet e pështira në Forumin Ekonomik Ndërkombëtar të Shën Petersburgut (SPIEF), shkruan Daily Mail.
Ajo tha se kishte dëgjuar disa rusë të thoshin: “E gjithë shpresa jonë është te zia e bukës”.
“Ja çfarë do të thotë,” tha ajo në forum. “Do të thotë se zia e bukës do të fillojë tani dhe ata do të heqin sanksionet ndaj nesh dhe do të jenë miq me ne, sepse do ta kuptojnë se është e nevojshme”.
Më shumë se 20 milionë tonë drithë janë bllokuar brenda Ukrainës pasi Rusia bllokoi portet e vendit në Detin e Zi.
Çmimet globale të ushqimeve po rriten si rezultat i pushtimit rus dhe është rritur frika se mungesat mund të shkaktojnë një zi buke globale dhe të përkeqësojnë krizën e urisë në Jemen dhe Etiopi.
Kombet e Bashkuara po përpiqen të ndërmjetësojnë një marrëveshje midis Ukrainës, Rusisë dhe Turqisë për të nxjerrë drithin nga vendi, por nuk ka arritur të bëjnë shumë përparim deri më tani.
