Kryeministri i vendit, Edi Rama, i pranishëm në Kongresin e Dytë Ndërkombëtar të Nanoteknologjisë, që u mbajt në Tiranë, foli për rëndësinë e arsimimit dhe fuqizimin e universiteteve tona, sa i takon fushës së kërkimit shkencor.

“Në këtë aspekt kemi shumë drejtim në të cilat po punojmë dhe për të cilat duhet të rrisim kapacitetet, duhet të rrisim dhe rezultatet dhe patjetër, edhe njësia e re e nanoteknologjisë do t’i shërbejë fuqizimit të këtij besimi dhe rritjes së këtyre rezultateve”, tha Rama.

Shefi  i qeverisë, vuri theksin gjithashtu tek projekti “Komuniteti i Ri Politik Europian”, projekt ky i cili fillimisht hasi në kritika të forta, për vetë faktin se u interpretua si zëvendësim i planit për integrimin Europian.

“Dua ta mbyll me një koment mbi një nismë, e cila deri pak vite më parë do ishte totalisht e paimagjinueshme, një nismë të përbashkët të Shqipërisë dhe Holandës apo Holandës dhe Shqipërisë, si të doni, për të angazhuar bashkësinë europiane në një drejtim ku ne synojmë një konkretizimin sa më real të vizionit dhe projektit të ri të Komunitetit të Ri Politik Europian”, tha Rama.

Ai përmendi një datë konkrete, në të cilën vendet e BE, por edhe ato jashtë saj ,do të mblidhen në Çeki për jetësimin e projekt-idesë së Komunitetit të Ri Politik Europian.

“Brenda pak ditësh, në datën 6, të gjithë liderët e kësaj gjeografie, që përfshin vendet e Bashkimit Europian, vendet e Ballkanit. Vende që janë shumë të zhvilluara, por që nuk janë në Bashkimin Europian si Zvicra e Norvegjia, e kështu ne radhë, do të mblidhen në Pragë për të diskutuar jetësimin e idesë së një Komuniteti të Ri Politik Europian”, tha ai.