Sipërfaqja nën ujë në territorin e Bashkisë Shkodër është zgjeruar gjatë orëve të mbrëmjes, ku përveç reshjeve shkarkimet e hidrocentraleve po japin ndikimin e tyre. Afro 1 mijë hektarë tokë bujqësore ndodhen nën ujë, ku Ana e Malit dhe Guri i Zi janë njësitë më problematike.
Kryetari i Bashkisë Shkodër, Bardh Spahia, ka parë nga afër situatën në disa njësi, ku fillimisht u ndal në Dajç. Ai bëri me dije se konviktet janë në dispozicion të familjeve që do të evakuohen.
Kryebashkiaku i bëri thirrje KESH që të informojë në kohë reale mbi shkarkimet, pasi në varësi të tyre varen ndërhyrjet në terren.
“Po ndjek me vëmendje situatën që kanë krijuar reshjet e shumta në Bashkinë Shkodër. Grupet tona të punës ndodhen në terren dhe kemi marrë masat për çdo rast që mund të paraqitet. Kërkoj bashkëpunimin e banorëve që në rast emergjence të kontaktojnë me strukturat e bashkisë për evakuim apo çdo nevojë tjetër që mund të paraqitet.
Si pasojë e shkarkimeve nga hidrocentralet e kaskadës së Drinit parashikohen orë të vështira, prandaj i bëj thirrje drejtuesve të KESH të informojnë në kohë dhe mënyrë periodike mbi prurjet dhe shkarkimet që të mos gjendemi në situata të paparashikuara“-shkruan kryebashkiaku në Facebook.
