Ministria ruse e mbrojtjes ka akuzuar Ukrainën se po përgatitet të hedhë në erë ndërtesa në qytetin lindor të Ukrainës, Kramatorsk dhe më pas të akuzojë Moskën për kryerjen e krimeve të luftës dhe shënjestrimin e civilëve.

Në një deklaratë në Telegram, ministria tha se Kievi planifikoi të shpërthejë tre ndërtesa mjekësore (ambulanca) dhe një spital dhe “të akuzojë Rusinë për një “sulm të qëllimshëm” të supozuar ndaj objekteve civile”.

“Sipas informacioneve të konfirmuara nga disa burime të pavarura, shërbimet speciale ukrainase synojnë të kryejnë një provokim në shkallë të gjerë në të ardhmen e afërt për të akuzuar Rusinë për gjoja kryerjen e krimeve të luftës”, thuhet në deklaratë.

“Për këtë qëllim, regjimi i Kievit planifikoi në qytetin e Kramatorsk një bombardim të kontrolluar të ndërtesave të dispansereve lokale narkologjike dhe onkologjike në mënyrë që të akuzonte Rusinë për gjoja një “goditje të qëllimshme” në objekte civile”, vijon më tej deklarata.

Në njoftim thuhej se Kievi duke parë dështimet ushtarake ndaj forcave ruse, kërkon që të bëjë provokime të tilla, për të marrë një mbështetje më të gjerë ndërkombëtare dhe për të siguruar më shumë armë moderne nga Perëndimi.

Ministria ruse e mbrojtjes nuk dha asnjë provë për pretendimet.