Valter Bami ka dalë këtë të hënë para gjykatës për t’u njohur me masën e sigurisë arrest me burg, masë e cila u konfirmua nga togat e zeza. 37-vjeçari u arrestua pasditen e së enjtes (Lexo më shumë) dhe akuzohet për “Mbajtje pa leje dhe prodhimi i armëve, armëve shpërthyese dhe i municionit”.

Vepra penale e ngritur ndaj Valter Bamit erdhi pasi gjatë marrjes në pyetje nga policia lidhur vrasjen e Ramazan Sinos, kunatit të Gentjan Bejtjes dhe plagosjes së 2 fëmijëve të tij të mitur, atij iu morën faktorë plotësues në duar nga ku rezultoi se kishte qëlluar me armë zjarri.

Bami dyshohet të jetë i përfshirë në atentatin e ndodhur më datë 4 Korrik në Larushkë. Vetë 37-vjeçari ka mohuar të ketë marrë pjesë në këtë ngjarja dhe ka pretenduar se në momentin e vrasjes ndodhej në shtëpi.

Pas vendimit të gjykatës, në një prononcim për gazetarët, avokati i tij mbrojtës tha se baruti i gjetur i ka mbetur nga qitjet që bën me një armë sportive që disponon prej tre vitesh me leje. Ai mohoi që klienti i tij të ketë lidhje me ngjarjen.