Kryeministri Edi Rama i shikon si të pajustifikueshme veprimet shtetit serb gjatë situatës në veri, i cili heroizoi personat që vranë efektivin e Kosovës.

Rama kërkon që në vend të një hetimi, duhet të merren masa të menjëhershme, pasi veprimet e mësipërme janë faktet e mjaftueshme që Serbia të sanksionohet.

Edi Rama:

Çfarë do të prisnim nga hetimi ndërkombëtar, që është shumë mirë të bëhet dhe në fund mund të japë ndonjë element më shumë. Ndërkohë pa pasur nevojë për një hetim, kemi faktin që nënvizuam së bashku me kryeministrin. Kemi krimin vrasjes së një efektivi të policisë dhe heroizimin e atyre që morën pjesë në vrasje. Në aspektin kriminalistik policor, hetimi ndërkombëtar sjell ndonjë element plus, por në aspektin politik të një shteti në raport me disa vlera të kësaj Europe që i përkasim, kjo është qartësisht e mjaftueshme, që minimalisht ato masa të cilat komisioni mund të marr pa nevojën e konsensusit mes vendeve anëtare, të ishin marrë menjëherë. Duhet të merren pa humbur kohë, është në lojë një gjë shumë më e madhe se kaq. Fati i një procesi që kërkon në radhë të parë, një qëndrim të vijueshëm të drejtë dhe të shpejtë të vetë BE-së, që është dhe ura e një dialogu që në asnjë mënyrë nuk të dështojë. Nuk ka nevojë për hetim ndërkombëtar për t’i hedhur këto hapa.