Nëntë persona janë arrestuar, pasi kundrejt pagesave 3500-5000 euro/person transportonin emigrantë nga Nepali, Afganistani, Bangladeshi dhe India, që ndiqnin itinerarin “Turqi-Greqi-Shqipëri” dhe synonin të kalonin në vendet e Bashkimit Europian.
Emigrantët, pasi grumbulloheshin në Greqi, kaloheshin nga pjesëtarët e këtij rrjeti, nga kufiri i gjelbër, në Sarandë, Gjirokastër dhe në Korçë. Më pas, emigrantët akomodoheshin në ambiente të ndryshme dhe transportoheshin me automjete të marra më qira, drejt Shkodrës, që të kalonin ilegalisht kufirin me Malin e Zi.
Operacioni “Fazat”, është zhvilluar gjatë 6 muajve të fundit, në bashkëpunim me Prokurorinë, me metoda proaktive dhe është dokumentuar me prova ligjore veprimtaria e shtetasve të përfshirë në këto raste, të cilët bashkëvepronin në formën e një grupi kriminal.
Blutë bëjnë me dije se gjatë periudhës hetimore, shërbimet e Policisë Durrës kanë mbajtur në vëzhgim nga Saranda në Shkodër, pjesëtarët e grupit kriminal të cilët i transportonin emigrantët, me automjete të marra me qira, kundrejt pagesës 3500 – 5000 euro/person.
Janë sekuestruar gjithashtu 7 automjete që përdoreshin për transportimin e emigrantëve, 4 000 euro dhe rreth 100 000 lekë, të përfituara nga kjo veprimtari kriminale, si dhe 19 celularë të pjesëtarëve të rrjetit.
Në kuadër të këtij operacioni janë vënë në pranga 9 shtetas, si më poshtë:
-F. K., 54 vjeç, banues në Tiranë, Sh. P., 58 vjeç, banues në Sarandë, D. S., 48 vjeç dhe R. H., 18 vjeçe, të dy banues në Kavajë (të arrestuar në flagrancë gjatë operacionit);
-A. T., 32 vjeç, banues në Krujë, H. M., 37 vjeçe, banuese në Kavajë, E. P., 49 vjeçe, banuese në Sarandë, E. S., 24 vjeç dhe L. K., 44 vjeç, të dy banues në Lushnjë (të ndaluar me urdhër nga prokurori, si rezultat i hetimeve).
Gjithashtu, u shpallën në kërkim shtetasit F. U., 29 vjeç dhe B. D., 23 vjeç, të dy banues në Krujë, si dhe nisi procedimi në gjendje të lirë për shtetasen H. B., 65 vjeçe, banuese në Durrës.
Në kuadër të këtij operacioni, më parë, janë vënë në pranga 4 shtetas të tjerë të cilët janë kapur në flagrancë, duke transportuar emigrantë, në aksin rrugor Lezhë-Shkodër dhe në Shijak.
Materialet procedurale do t’i kalojnë Prokurorinë pranë Gjykatës së Shkallës së Parë të Juridiksionit të Përgjithshëm Durrës, për hetime të mëtejshme.
