Platforma e-Albania do të jetë përkohësisht jashtë funksionit për një periudhë dy ditore, njofton një komunikatë zyrtare. Shërbimet do të rikthehen me datë 4 shkurt pas rregullimeve dhe optimizimit të shërbimeve publike dhe infrastrukturave të tyre mbështetëse.

Në një njoftim të publikuar, qytetarët dhe bizneset informohen se nga data 2 shkurt, ora 20:00 deri më datë 4 shkurt, ora 10:00, e-Albania do të jetë jashtë funksionit. Pas kësaj periudhe, shërbimet online do të rikthehen, por procesi i identifikimit në platformë do të përfshijë edhe vendosjen e një kodi 6-shifror në numrin e telefonit të përdoruesit, përveç kredencialeve të zakonshme (NID/NIPT dhe fjalëkalimi).

Kjo ndërprerje e përkohshme synon të përmirësojë eksperiencën dhe efikasitetin e shërbimeve në e-Albania.

“Në kuadër të optimizimit të shërbimeve publike dhe infrastrukturave të tyre mbështetëse, bëjmë me dije qytetarëve dhe bizneseve se nga dita e premte më datë 2 shkurt, ora 20:00 deri ditën e diel më datë 4 shkurt ora 10:00 shërbimet që ofrohen në e-Albania di të jenë përkohësisht jashtë funksionit.
Njoftojmë të gjithë qytetarët dhe bizneset se me rikthimin e shërbimeve online, identifikimi në e-Albania në vijim do të kryhet duke vendosur përveç kredenciale tuaja (NID/NIPT dhe fjalëkalimin) edhe kodin 6 shifror në numrin tuaj të telefonit në çdo rast identifikimi apo ndryshimi fjalëkalimi”, sqarohet në njoftimin e publikuar.