Një 19-vjeçar nga Koplik është arrestuar nga policia, ndërsa dy të mitur janë proceduar penalisht pas vjedhjes së një furgoni në një vendparkim, të cilin e kishin fshehur në një zonë të pyllëzuar në fshatin Culaj, pranë Liqenit të Shkodrës.

Shtetasi me iniciale V. Gj. kishte denoncuar vjedhjen e furgonit nga një vendparkim në Koplik gjatë natës. Pas këqyrjes së kamerave të sigurisë dhe hetimeve intensive, policia ka gjetur dhe sekuestruar automjetin, duke hedhur në pranga 19-vjeçarin Mikael Hysa, i dyshuar si autori kryesor i vjedhjes.

Gjithashtu, dy të mitur, një 15-vjeçar dhe një 17-vjeçar, janë proceduar penalisht si bashkëpunëtorë të 19-vjeçarit. Shërbimet e Komisariatit të Policisë në Malësinë e Madhe kanë organizuar punën për identifikimin dhe kapjen e autorëve duke reaguar menjëherë pas denoncimit të shtetasit V. Gj.

Materialet procedurale janë dërguar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për hetimet dhe veprimet e mëtejshme.