Një aksident i trefishtë ka ndodhur mesditën e sotme në aksin nacional Memaliaj-Krahës, ku një 40-vjeçare, e identifikuar si Dhoksi Mango, ka humbur jetën pas një përplasjeje automobilash. Trupi i saj është dërguar në morgun e Tepelenës, ndërsa burri i saj, Ledian Ibrahimi, dhe dy persona të tjerë kanë pësuar gërvishtje të lehta dhe janë transportuar në spitalin e Gjirokastrës.

Aksidenti ka ndodhur rreth orës 11:45, kur automjeti i drejtuar nga shtetasi A. M. ka përplasur automjetin e drejtuar nga shtetasi L. M. Nga përplasja kanë rezultuar dëmtimet e rënda që i kanë shkaktuar humbjen e jetës 40-vjeçares, ndërsa dy drejtuesit e automjeteve dhe një pasagjer tjetër janë lënduar.

“Rreth orës 11:45, në aksin rrugor “Memaliaj-Krahës”, janë përplasur automjeti me drejtues shtetasin A. M. me automjetin me drejtues shtetasin L. M.. Nga përplasja janë dëmtuar 2 drejtuesit e automjeteve dhe 1 pasagjere ende e paidentifikuar. Si pasojë e dëmtimeve, shtetasja ka humbur jetën, ndërsa 2 drejtuesit e automjeteve janë në kujdesin e mjekëve”,- njofton policia.

Dhoksi Mango, një specialistja në zyrën e gjendjes civile në Njësinë Administrative Petran, në Përmet, ka lënë pas një djalë të vogël rreth 1 vjeç e gjysmë. Burri i saj, Ledian Ibrahimi, punonte në një shoqëri private sigurie si roje.

Policia është ende në vendngjarje duke vlerësuar dëmet dhe duke hetuar për të zbuluar shkakun e aksidentit të trefishtë. Ngjarja ka shkaktuar trishtim në komunitetin lokal dhe në familjen e të ndjerës.