Nga Mynihu, kryeministri Edi Rama shprehu kritikat ndaj presidentit serb, Aleksandër Vuçiç, për vendimin e tij për të shpallur gjendje të zi pas sulmit në Banjskë. Rama u ndal në rëndësinë e zgjedhjes së vendit të tij për integrim në Evropë dhe ndikimin e kësaj zgjedhjeje në qëndrimin ndaj ngjarjeve të tilla. Ai theksoi se shqiptarët, në të shkuarën, nuk kishin mundur të zgjidhnin, ndaj pasi që kishin mundësi, thanë “E duam Shqipërinë si gjithë Evropën”. Megjithatë, ai shprehu nevojën për të mos i shfrytëzuar këto rrethana si justifikim për mosbërjen e detyrave të shtëpisë, duke përmendur se edhe nëse dikush tjetër bën veprime të kundërta me parimet e tyre, kjo nuk duhet të pengojë realizimin e detyrave. Rama shprehu se Serbia ka dështuar në përfundim të punës së saj jo vetëm atë ditë që ndodhi sulmi në Banjskë, por edhe pasojat e vendimit të presidentit Vuçiç për të shpallur ditë të zi për sulmin.

“Unë besoj se ka një gjë thelbësore që nuk duhet harruar, sidomos nga ana jonë. Pra nga ana e vendeve që kanë bërë zgjedhjen, sepse askush sinqerisht s’na ka detyruar që të vendosim se ku të pozicionohemi. Shqiptarët veçanërisht s’kanë patur shansin të zgjedhin për shekujt të tërë dhe ditën e parë që mundën të bërtisnin atë që donin, thanë “E duam Shqipërinë si gjithë Europën”, ky ishte slogani”, tha Rama.“Jo, tani duam Evropën si Shqipëria, por kjo është temë tjetër. Ne kemi zgjedhur. Për mua nuk është kurrë kjo një justifikim për të mos bërë detyrat e shtëpisë, në qoftë se dikush tjetër, bënë gjëra që të cilat sigurisht nuk janë aspak pjesë e apo në kuadër të botës që ne duam, dhe ku duam të jetojmë dhe që natyrisht janë në kundërshti me zgjedhjen tonë. Serbia vërtetë e ka prishur punën jo atë ditë që ndodhi Banjska, por të nesërmen, kur presidenti Vuçiç e shpalli ditë zie për ata që e kryen sulmin”, tha Rama.