Shtatë shqiptarë janë arrestuar për trafik droge në Itali gjatë një operacioni të koordinuar nga Drejtoria e Qarkut Antimafia e Prokurorisë së Firences. Operacioni u zhvillua midis provincave të Firences dhe Pratos.

Në kuadër të këtij operacioni, më 5 shkurt, u ekzekutuan 78 masa të tjera sigurie, prej tyre 70 arrest në burg dhe 8 në arrest shtëpie. Të arrestuarit përkasin organizatave të trafikut të drogës që veprojnë mes Italisë, Shqipërisë, Holandës, Spanjës, Gjermanisë, Mbretërisë së Bashkuar, dhe Zvicrës, raporton ANSA.

Shtatë personat e arrestuar sot janë të gjithë me kombësi shqiptare, njësoj si pjesa më e madhe e personave të arrestuar në fillim të muajit. Hetimet që çuan në goditjen e rrjetit të gjerë të trafikut ndërkombëtar të drogës nisi nga sekuestrimi i 2 kilogramë marijuanë. U hetua një person “i shkëputur nga organizata” i cili së bashku me bashkatdhetarët e tjerë të vendosur në Shqipëri, vijuan aktivitetin e importimit dhe tregtimit të kokainës, hashashit dhe marijuanës, të pavarur, nga viti 2018 deri në verën e vitit 2022.

Droga, në sasi të mëdha, u transportua në kamionë të kompanive të transportit zyrtarisht të rregullt, të modifikuar në mënyrë të përshtatshme për të fshehur drogën.

Për hetimet u ngrit një ekip i përbashkët mes policisë shqiptare, të koordinuar nga Dia e Firences dhe Prokuroria Speciale e Tiranës, SPAK, e specializuar në luftën kundër krimit të organizuar dhe korrupsionit.