Një gjetje e shqetësueshme në dyqanin e një avokati në Sarandë: Eksploziv i gjetur, por nuk shpërtheu

Në dyqanin në pronësi të një avokati në Sarandë është gjetur një sasi eksplozivi. Tritoli ishte vendosur në dyqanin ‘Alexandra Event’, në pronësi të avokatit Ilia Thanasi.

Lënda plasëse, siç shihet edhe nga pamjet nuk ka shpërthyer. Policia rrethoi zonën dhe forcat xheniere larguan eksplozivin.

Autori duket se është treguar i kujdesshëm që mos të fiksohej nga kamerat, pasi para vendosjes së lëndës plasëse ka ulur automatin me qëllim që të mos kapej nga kamerat. Më pas ai ka vendosur lëndën plasëse dhe është larguar. Por, duket se plani nuk i ka shkuar siç duhet, pasi tritoli nuk ka shpërthyer. Në foton më poshtë dallohet që fitili është ndezur, por lënda plasëse nuk ka shpërthyer.

Dyqani ‘Alexandra Events’ shërben për shitjen e luleve, organizimin e festave apo eventeve në qytetin bregdetar të Sarandës. Dyqani menaxhohet nga Aleksanda Thanasi, gruaja e avokatit. Ndërkohë, ajo është shoqëruar nga Policia për të dhënë dëshminë e saj.

Zona ku është vendosur eksplozivi, në rrugën “Adem Sheme”, është mjaft e frekuentuar nga qytetarët e Sarandës. Po ashtu pranë vendit të ngjarjes ndodhen zyrat e OSHEE, si edhe dy shkolla, një publike dhe një private.

“Sot, rreth orës 08:20, në lagjen nr. 2, Sarandë, në derën e jashtme të një dyqani në pronësi të shtetasit Ilia Thanasi, është konstatuar një kallëp me lëndë të dyshuar plasëse”, njofton policia.

Deri më tani policia nuk ka ende asnjë gjurmë nga autori që ka vendosur lëndën plasëse. Grupi hetimor po punon për identifikimin dhe kapjen e autorit. Policia do të kontrollojë edhe pamjet e kamerave të sigurisë në zonë, të cilat mund të ndihmojnë në identifikimin e autorëve.