Plataforma e mesazheve WhatsApp po teston një funksionalitet të ri që ndalon përdoruesit të bëjnë ‘screenshot’ të profileve të përdoruesve të tjerë.

Ky funksion synon të rrisë nivelin e privatësisë duke parandaluar shkarkimin dhe ndarjen e fotove personale pa lejen e tyre.

Sipas informacioneve nga WABetaInfo, versioni më i fundit beta i WhatsApp për Android do t’i informojë përdoruesit se nuk mund të bëjnë ‘screenshot’ për shkak të kufizimeve të aplikacionit, nëse ata përpiqen ta bëjnë këtë në profilin e një personi tjetër.

Kjo masë e sigurisë është e ngjashme me disa aplikacione të tjera si Snapchat dhe aplikacionet e pagesave si Paytm dhe Google Pay. Megjithatë, përdoruesit ende do të jenë në gjendje të bëjnë një foto të profil-fotografisë duke përdorur një pajisje dytësore si telefoni ose kamera. Funksionaliteti aktualisht është i disponueshëm vetëm për një pjesë të vogël të testuesve beta, por pritet të shpërndahet për të gjithë përdoruesit në javët e ardhshme.