Një ngjarje e rëndë ka ndodhur në Pogradec, ku një 27-vjeçar është plagosur nga një grup individësh të pajisur me armë dhe makina. Vëllai i të plagosurit ka ngritur akuza të rënda ndaj një personi, Deis Meko, i cili sipas tij drejton një bandë kriminale dhe ka pasur implikime në ngjarje të tjera të rënda.

Sipas vëllait të të plagosurit, ngjarja nuk është një rast i izoluar, pasi krimineli Deis Meko ka pasuar veprimtari të këqija në lagjen ku operon. Akuza bëhet se policia nuk ka marrë masa paraprake për të parandaluar ngjarjen, ndërkohë që vazhdimisht favorizon këtë person. Ai akuzon se krimineli ka lidhje me trafik kokaine dhe drejton lokale në të cilat kryhen veprimtari të paligjshme.

“Dje në Pogradec ka ndodhur një ngjarje, ku është plagosur vëllai im, Alted Jolldashi. Krimineli Deis Meko, bashkë me bandën e tij i kanë zënë pritë vëllait tim dhe e kanë plagosur me pistoletë tip TT me 4 plumba, një në gjoks, një në dorë, një në këmbë dhe një në shpatull. Siç duket nga video, krimineli Deis Meko ka qenë me 3 makina dhe vetë i shtati kur ka qëlluar 4 herë me pistoletë dhe ka rrezikuar jetën e dhjetëra fëmijëve, që ishin në ato momente pranë vendngjarjes. Krimineli Deis Meko favorizohet nga inspektorët e policisë, pasi ai iu jep ryshfet atyre. Efektivët e Komisariatit të Pogradeci po e ndihmojnë kriminelin Deis Meko, që ngjarjen ta marrë përsipër një tjetër kriminel, një person me inicialet K.L, 27 vjeç, që Meko e mban për raste si kjo që sapo ndodhi. Krimineli Deis Meko është i implikuar në punë të jashtëligjshme si shitja e kokainës në 4 lokale që i disponon në Pogradec, që i përdor edhe për shpërndarje fajdesh dhe lojëra fati. Çdo gjë mund të verifikohet lehtësisht sapo të jeni në Pogradec dhe të pyesni për këtë person. Kjo, sepse njihet shumë mirë se është kontigjent kriminal. Policia nuk ka marrë masat përpara se të ndodhte ngjarja, pasi përpara 6 muajve vëllain tim e kanë pritur 7 persona me maska e armë dhe ne kemi bërë denoncime e nuk ka ndodhur asgjë. E kanë goditur me leva e armë dhe është shtruar në spital e policia nuk ka marrë askënd në pyetje për këtë ngjarje. I bëj thirrje ministrit dhe mediave, që të vihet në vend drejtësia”, deklaroi vëllai i Alted Jolldashit

Ndërkaq, polici ka reaguar duke thënë se kanë ndërmarrë masa dhe kanë arrestuar një person në lidhje me ngjarjen. Hetimet janë ende në kurs dhe autoritetet po punojnë për zbardhjen e plotë të rrethanave dhe identifikimin e të gjithë përfshirëve në ngjarje.