Pamjet e një përplasje të dhunshme ndërmjet dy bandave shqiptare në qendër të Frosinones, Itali, janë publikuar, ku një person u vra dhe tre të tjerë u plagosën rëndë. Në lokalin e mbushur me qytetarë, klientët vrapuan për jetën ndërsa një 23-vjeçar shqiptar u arrestua në lidhje me ngjarjen, ndërsa 3 të tjerë janë ende në kërkim.

Ngjarja filloi brenda Shake Bar, një lokal i frekuentuar nga të rinjtë shqiptarë, ku dy grupet u përplasën dhe konflikti vazhdoi në rrugë. Në pamjet e publikuara, shihen momentet e tmerrshme kur klientët përpiqen të shpëtojnë nga plumbat. Në këtë ngjarje të dhunshme, 27-vjeçari shqiptar Kasem Kasmi humbi jetën, ndërsa tre të tjerë janë plagosur seriozisht.

23-vjeçari Mikea Zeka është arrestuar nga karabinierët dhe akuzohet për vrasje me paramendim dhe vrasje të trefishtë të mbetur në tentativë. Ai pretendon se ka vepruar për vetëmbrojtje. Hetimet po përqendrohen në motive të mundshme të tjera, përfshirë trafikun e drogës dhe prostitucionin. Kryebashkiaku i Frosinones ka shprehur tronditjen e tij dhe ka njoftuar për një mbledhje të komisionit të sigurisë dhe rendit.

Kryebashkiaku i Frosinone: Jam i shokuar

Për ngjarjen reagoi edhe kryebashkiaku i Frosinones i cili tha se ishte i shokuar nga krimi i rëndë që ndodhi në lokalin më të frekuentuar nga të rinjtë e qytetit dhe njoftoi mbledhjen e komisionit të sigurisë dhe rendit.

“Jam i shokuar, nuk mund të them asgjë. Për mua kjo që ndodhi është e pashpjegueshme. Është një plagë për të gjithë qytetin. Mund të konfirmoj që nesër në mëngjes do të flasim me prefektin”, tha Riccardo Mastrangeli.