Ministri i Brendshëm Taulant Balla u shpreh se ka ardhur koha që të investohemi në burimet e duhura njerëzore për shërbimin zjarrfikës, duke theksuar tiparet e veçanta të këtij shërbimi për sigurinë në vend. Ai nënvizoi nevojën për ndryshime në mënyrën e përzgjedhjes së punonjësve të shërbimit zjarrfikës dhe shpëtimit.
“Kam besimin se kryetarët e bashkive e kuptojnë që vendi i punës së punonjësit të zjarrfikësit nuk është një vend për të bërë qokë!”, tha Balla. Ministri gjithashtu shprehu qëllimin për të përmirësuar procesin e vlerësimit dhe certifikimit të punonjësve të shërbimit zjarrfikës.
“Do të vazhdojmë të plotësojmë strukturat operacionale, duke përfshirë edhe Akademinë e Sigurisë, në trajnimin dhe certifikimin e të gjitha niveleve në shërbimin zjarrfikës. Marrja e gradës nuk mund të jetë më një vlerësim fiktiv, por duhet të jetë një vlerësim objektiv i performancës dhe eksperiencës së fituar në këtë shërbim”, shtoi ministri.
Deklaratat e ministrit u bënë gjatë ceremonisë së dorëzimit të disa mjeteve zjarrfikëse, dhuruar nga Qeveria Polake, për 3 bashkitë Lezhë, Fier e Pogradec, në kuadër të programit “Forcimi i Kapaciteteve të Shërbimit të Mbrojtjes nga Zjarri dhe Shpëtimit të Shqipërisë”. Programi është financuar nga Qeveria e Polonisë dhe zbatuar nga Programi i Kombeve të Bashkuara për Zhvillim (UNDP), në bashkëpunim me DPMZSh në Ministrinë e Brendshme, duke përfituar 10 bashki në të gjithë vendin.
