Pas masakrës me 137 të vdekur në Moskë, presidenti Vladimir Putin ka shpallur 24 marsin ditë zile. E gjithë Rusia është në zi pas sulmit në sallën e koncerteve, ku përveç 137 viktimave, 180 të tjerë u plagosën. Udhëheqësi i Koresë së Veriut, Kim Jong Un, i shprehu ngushëllimet e tij presidentit rus, Vladimir Putin, njoftoi sot agjencia shtetërore e lajmeve KCNA. Ndërkohë, autoritetet ruse thanë se 11 persona u arrestuan gjithsej dhe katër personat e armatosur u kapën teksa po shkonin për në Ukrainë.
“U nisën drejt Ukrainës, ku u ishte përgatitur një ‘dritare pritjeje’. Kriminelët dolën për të vrarë gjakftohtë. Të gjithë autorët, organizatorët dhe ekzekutuesit e sulmit terrorist do të ndëshkohen me drejtësi”, tha presidenti Putin.
Nga ana tjetër, Kievi hedh poshtë pretendimet se është përfshirë në sulm, duke i cilësuar si “absurde”.
“Ky Putin i pavlerë, në vend që të merrej me qytetarët e tij të Rusisë, duke iu drejtuar atyre, heshti për një ditë – duke menduar se si ta sillte këtë në Ukrainë”, tha presidenti ukrainas Volodymyr Zelesnky në fjalimin e tij të natës.
Grupi Shteti Islamik (IS) thotë se qëndron pas sulmit. Shteti Islamik ka nxjerrë një foto ku pretendohet se janë katër sulmuesit e djeshme në Moskë. Fotot e të katërve janë të mbuluar, teksa Shteti Islamik ka marrë përgjegjësinë për sulmet, duke thënë se kjo është pjesë e atyre vendeve që luftojnë Islamin.
Këshilli i Sigurisë Kombëtare i SHBA-së tha se e paralajmëroi Rusinë për një sulm të mundshëm në Moskë në fillim të këtij muaji. Kremlini në atë kohë e hodhi poshtë paralajmërimin si “propagandë” dhe një përpjekje të Uashingtonit për të ndërhyrë në zgjedhjet e fundit ruse.
Sulmi ndodhi më 22 mars, ku persona të armatosur dhe të veshur me uniforma ushtarake, qëlluan pa mëshirë ndaj spektatorëve në sallën e koncerteve ku duhej të performonte një grup muzikor i kohës sovjetike. Video tronditëse, tregojnë 6200 qytetarë të tmerruar duke u larguar nga salla mes krismave dhe britmave. Autorët para se të largoheshin me një automjet të tipit Renault, lëshuan pas granata dhe lëndë plasëse, duke shkaktuar zjarr në ndërtesë.
