Partia Socialiste ka konkretizuar nismën për shkarkimin e Presidentit Ilir Meta, nismë e cila nisi menjëherë pas fitores së PS në zgjedhjet e 25 prillit.

Konferenca e Kryetarëve është mbledhur këtë të hënë për nismën e PS për shkarkimin e Presidentit Meta. PS ka mbledhur deri më tani 47 firma për nismën, teksa Taulant Balla ka prezantuar nismën e cila do të futet në kalendarin e punimeve të Kuvendit.

Në mbledhjen e sotme të Konferencës së Kryetarëve u miratua programi i  punës së Kuvendit për periudhën 10 maj-9 korrik 2021 dhe kalendarin e punimeve për periudhën 4-21 maj 2021.

Konferenca vendosi zhvillimin e seancave plenare në datat 4 maj, 6 maj, 13 maj dhe 20 maj 2021.

Kjo është hera e dytë që PS inicion shkarkimin e Metës, kur nga e para u tërhoq, kësaj radhe mazhoranca akuzon Presidentin për shkelje kushtetuese gjatë fushatës elektorale për zgjedhjet e 25 prillit.

MESAZHI PER DEPUTETET

Javën e kaluar, të gjithë deputetëve socialistë u mbërriti një mesazh ku thuhej: “Bazuar në disa shkelje të rënda të Kushtetutës sipas parashikimeve të nenit 90, nga ana e Presidentit Ilir Meta përpara dhe gjatë fushatës zgjedhore, në konsultim me Kryesinë e Grupit Parlamentar kemi vendosur të iniciojmë Procedurën e Shkarkimit të Presidentit të Republikës”.