Para se të shpërthejë me akuza ndaj SPAK dhe sistemit të drejtësisë në konferencën për mediat, Ilir Meta foli edhe për revolucionin kundër xhimkave në parti.

Revolucionin, pikë së pari, do ta nisë me pozicionin e tij.

“PL nuk mund të vazhdojë me këtë lidership kakofonik, pra me shumë nënkryetarë, ku përgjegjësitë nuk mbahen në mënyrë të qartë. Nuk mund të vazhdojë me një kryesi që nuk është efektive dhe e angazhuar. Na duhet një kryesi ekzekutive që merr vendime, që reagon shpejt. Nuk do të ketë më kryetar, por do të ketë President që do të jetë lideri i partisë. Unë sigurisht që do të kandidoj për president në Konventë. Ftoj kolegët të kandidojnë për këtë funksion apo detyrë të re”, tha Meta. Bashkëpunëtorët e tij të ngushtë i kishte në krah ndërsa pozicionet ua prezantua po vetë, ndërsa më pas ftoi edhe të tjerët të kandidojnë.

“Do të ketë vetëm një zv. president. Në vlerësimin tim do të jetë zv. presidente, dhe kandidati për president është Erisa Xhixho. I vetmi kandidat për Sekretar i Përgjithshëm është korçari, kolonjari, Tedi Blushi”, vijoi Meta.

I pyetur për Monika Kryemadhin, Ilir Meta tha se ai mund të kandidojë përballë tij por në drejtim do të jetë vetëm njëri.

“Do t’i japim një goditje asgjësuese nepotizmit në Partinë e Lirisë. Do t’i japim një goditje krahinalizmit. Statuti nuk bëhet për një njeri. Znj. Kryemadhi por jo vetëm ajo por për të gjitha rastet, nëse do të kandidojë për Presidente është e mirëpritur. Nëse do të kandidojë për pozicione të tjera është e mirëpritur pasi Konventa të zgjidhë problemin e KDK-së.”

Ilir Meta tha se Konventa e 27 prillit do të jetë një ndarje e partisë së tij nga e kaluara, për të cilën tha se do të bëhet forcë e parë shumë shpejt.