Ministrja e Shtetit për Rininë dhe Fëmijët, Bora Muzhaqi, ka bërë të ditur sot shpalljen e thirrjes së katërt të Agjencisë Kombëtare të Rinisë për projekt-propozime rinore, të drejtuar organizatave rinore dhe për të rinjtë.

Në lidhje me prioritetet e thirrjes së katërt për projekt-propozime rinore, ministrja Bora Muzhaqi ka theksuar se synimi është të adresohen tre prioritetet kryesore të Strategjisë Kombëtare të Rinisë 2022-2029:

1. Nxitja e pjesëmarrjes së të rinjve në proceset vendimmarrëse dhe mbështetja e aktivizmit shoqëror dhe qytetar të tyre.
2. Nxitja e punëve të denja dhe ndërlidhjes së të rinjve me tregun e punës.
3. Mbështetja e mirëqenies aktive, të shëndetshme, fizike, sociale, kulturore dhe mendore e të rinjve.

Ministrja Muzhaqi vlerësoi se shpallja e kësaj thirrjeje për projekt-propozime rinore është një hap i rëndësishëm për të vazhduar mbështetjen e iniciativave rinore.

Thirrja do të qëndrojë e hapur për një periudhë prej 30 ditësh, filluar nga data 17 prill deri më 16 maj 2024.

Informacione të detajuara për kriteret dhe procedurat e aplikimit mund të gjeni në faqen zyrtare të Agjencisë Kombëtare të Rinisë.