Kryetarja e Komisionit të Shëndetësisë, deputetja e Partisë Demokratike, Zheni Gjergji, shpreh shqetësimin e saj për projektligjin për shëndetin riprodhues, të cilin ministria e Shëndetësisë e ka nxjerrë për konsultim publik.

Në një deklaratë për media, Gjergji thotë se projektligji është hartuar në fshehtësi në klinika private për interes të tyre, duke e quajtur një hap drejt monopolizimit të shëndetit riprodhues.

“Hartimi i tij në fshehtësi nëpër klinika private, të cilat ditën e bllokojnë shërbimet publike dhe natën i japin jetë aktiviteteve të pakontrolluara, hap rrugë për monopolin e shëndetit riprodhues. Ministria e Shëndetësisë, me këtë projektligj, do të ketë mundësinë të përcaktojë dhe të licencojë ekspertët e riprodhimit me kritere të dyshimta, duke rrezikuar përfundimisht shërbimet e shëndetit seksual dhe riprodhues të asistuar”, tha Gjergji.

Gjithashtu, ajo shprehet për një tjetër shqetësim lidhur me projektligjin, duke përmendur rrezikun e shfrytëzimit të nënave surrogate dhe mungesën e kontrollit ligjor për këtë çështje.

Projektligji parashikon që ky akt të realizohet përmes marrëveshjes me shkrim ndërmjet palëve, një praktikë që Gjergji e quan “hapësirë ligjore abuzive”. Ajo gjithashtu thekson se në vendet e Europës, një praktikë e tillë është e ndaluar dhe duhet të vendoset nga një vendim gjykate.

Gjergji kritikon edhe faktin që drafti i ligjit është shkruar me gabime dhe fjali të shtuara, tregues i një përpjekjeje të përshpejtuar dhe interesa klienteliste.

“Ky projektligj I hartuar përfiton skutat e klinikave private në kurriz të interesit publik, dhe shkatërron përfundimisht shërbimet e shëndetit seksual dhe riprodhues. Në vend që të hartojmë politika që mbështesin jetën, të rinjtë dhe gratë, qeveria ndërmerr një nismë që shkon në kundërshtim me interesin e shoqërisë dhe favorizon klientelën e radhës që e sheh këtu një mundësi të madhe për biznes”, nënvizon Gjergji.