Në një shfaqje televizive, kryetari i PASOK-ut, Nikos Androulakis, akuzon Kryeministrin grek Kyriakos Mitsotakis për vendosjen e Fredi Belerit në listën e kandidatëve për eurodeputetë të partisë “Demokracia e Re” si një veprim që nuk përmban motive kombëtare apo evropiane, por është një përpjekje për të fituar vota. Edhe eurodeputetja Evi Kristofilopulu shpreh mendimin se përfshirja e Belerit është mbi të gjitha një vendim interesash partiak mbi ato kombëtare.

Në këtë kontekst, e majta greke vlerëson se Fredi Beleri është më i rëndësishëm si kryetar i Bashkisë së Himarës për të mbrojtur të drejtat dhe pronat e minoritetit grek në Shqipëri.

Megjithatë, edhe pse ligji grek lejon Belerin të jetë kandidat, nëse zgjidhet eurodeputet do të duhet të japë dorëheqjen si kryetar i zgjedhur i Bashkisë së Himarës.

Sondazhet e fundit në Greqi tregojnë për një epërsi të Belerit, edhe pse ai renditet i 42-ti në listën e Kryeministrit Mitsotakis, që e bën atë një pretendent të mundshëm për të qenë mes 5 eurodeputetëve fitues në zgjedhjet e ardhshme për Parlamentin Europian.