Vajza e një çifti shqiptar në Greqi, e cila humbi nënën e saj nga një vrasje brutale me thikë nga ish-burri i saj, Eduard Danaj, ka rrëfyer për mediat vendase se kishte qenë e terrorizuar nga kërcënimet e tij për vrasje.

Ajo shprehu se babai ishte një person i alkoolizuar, agresiv dhe xheloz ndaj nënës së saj, duke besuar se ajo e tradhtonte. Megjithëse ai kishte qenë i dhunshëm, vajza tha se asnjëherë nuk kishte goditur as atë as vëllain.

“Gjithmonë e mbaj mend duke pirë. Kur pinte bëhej agresiv ndaj nesh. Mbaj mend që ai godiste mamanë time. Ai mendonte se nëna ime po e tradhtonte dhe ishte shumë xheloz. Ai na kërcënonte se do të na vriste dhe do të vriste veten. Mua dhe vëllain nuk na ka goditur kurrë”, pohon vajza, sipas ANT1.

Ndërkaq, në deklaratën e tij në gjykatë, Eduard Danaj kërkoi falje për veprën e tij dhe pranoi krimin, duke shprehur pendesë për të. Pas tragjedisë, Enkelejda Danaj u varros në vendin e saj të lindjes, në Vlorë, më 18 maj.