Një rast i mbajtjes së armëve pa leje ka goditur qytetin e Bulqizës, ku 18-vjeçari K.S. u arrestua dhe 21-vjeçari E.T. u shpall në kërkim pasi qarkullonin me armë zjarri në automjet.
Të rinjtë refuzuan të bindeshin nga urdhrat e Policisë, por është arritur vetëm arrestimi i pasagjerit 18-vjeçar. Ndërkohë, 21-vjeçari është arratisur duke u shpallur në kërkim.
Si pasojë, u sekuestrua një armë zjarri dhe 130 fishekë. Prokuroria e Dibrës do të merret me hetimet e rastit.
Njoftimi i Policisë:
Në zbatim të masave të planit operacional “Sundimi i ligjit”, një tjetër rast i mbajtjes së armëve pa leje u godit në qytetin e Bulqizës. Dy shtetas qarkullonin me automjet, të armatosur me armë zjarri, ku u kap 18-vjeçari, ndërsa vazhdon puna për kapjen e drejtuesit të mjetit.
U sekuestrua 1 armë zjarri dhe 130 copë fishekë. Shërbimet e Policisë, duke u bazuar në informacionet e siguruara në rrugë operative, kanë organizuar punën për kapjen e dy shtetasve të armatosur.
Si rezultat, në lagjen “Minatori”, policia ka konstatuar automjetin e dyshuar dhe ka bërë shenjë ndalimi. Megjithatë, drejtuesi i automjetit refuzoi urdhrin për ndalim dhe u largua me shpejtësi, duke rrezikuar jetën e punonjësve të policisë.
Policia vijoi ndjekjen e automjetit të dyshuar dhe arriti të arrestojë njërin prej tyre (pasagjer), shtetasin K.S., 18 vjeç, ndërsa drejtuesi i automjetit, shtetasi E.T., 21 vjeç, u arratis në këmbë pasi braktisi mjetin. Punohet intensivisht për kapjen e tij.
Gjatë kontrollit në automjet, u gjet dhe u sekuestrua një armë zjarri dhe 130 fishekë.
Materialet procedurale janë dorëzuar te Prokuroria pranë Gjykatës së Shkallës së Parë të Juridiksionit të Përgjithshëm Dibër për veprime të mëtejshme.
