Alketa Pere, një nga mjeket e akuzuara për skandalin në Spitalin Onkologjik në QSUT, foli për mediat para seancës në gjykatë. Ajo theksoi nevojën për ndryshime në strukturën dhe pajisjet e spitalit, duke u shprehur e lumtur që prokurori e kishte quajtur procesin një “rrugëtim”.

“Duhet të ndryshojnë struktura e spitalit, pajisjet. Jam shumë e lumtur me prokurorin që e ka quajtur rrugëtimi, dhe duhet që çdo njeri ta dijë rrugëtimin e pacientit,” tha Pere.

Ajo theksoi se në spitalin e tyre nuk ka shkelje dhe bëri thirrje për sqarim të plotë të çështjeve lidhur me drejtimin e pacientëve në sektorin privat. “Nuk e di për spitalet e tjera, në spitalin tonë nuk ka shkelje. Duhet të sqarohen mirë gjërat kush i ka drejtuar pacientët në privatë.”

Pere theksoi se nuk përfaqëson shtetin dhe se ka vepruar në emër të saj. Ajo gjithashtu përmendi se dosja e saj për drejtimin e institucionit ishte hedhur në plehra. “Unë nuk kam shteti, përfaqësoj veten time dhe në momentin që kam mbledhur dosjen time për të konkurruar për drejtimin e atij institucioni, ka përfunduar në plehra dosja ime.”

Përfundimisht, ajo u shpreh se nuk ndihet përgjegjëse dhe se do të vazhdojë të punojë në Spitalin Onkologjik. “Nuk jam e shkarkuar, patjetër që do shkoj në Onkologjik,” përfundoi ajo.