Avokatja e Fredi Belerit, Klodiana Gjyzari, deklaroi gjatë mbledhjes së KQZ-së, ku po shqyrtohej mandati i kryebashkiakut të zgjedhur të Himarës, se procedura është e pavlefshme dhe KQZ po i tejkalon kompetencat e saj.

Gjyzari argumentoi se KQZ nuk ka kompetencë për të shqyrtuar vlefshmërinë e mandatit të Belerit pasi ky mandat tashmë është dhënë. Ajo theksoi se as Kodi Zgjedhor dhe as neni 138 nuk i japin të drejtë KQZ-së për të ndërmarrë një iniciativë të tillë në këtë fazë.

“Konstatoj që KQZ nuk e ka kompetencën për të marrë këtë iniciativë, pasi nuk ia parashikon as Kodi Zgjedhor dhe as neni 138 të drejtën që të vlerësojë vlefshmërinë e zgjedhjeve në këtë fazë, ku Beleri e ka marrë mandatin nga KQZ. Duke qenë se nuk ka asnjë dispozitë që i jep të drejtë KQZ që të marrë iniciativa të tilla, procedura është absolutisht e pavlefshme pasi organi administrativ ka tejkaluar kompetencat që parashikon ligji. Ne kërkojmë pushimin e procedurës,” – tha avokatja.

Fredi Beleri është dënuar nga Gjykata e Apelit me dy vite burg për akuzën “korrupsion aktiv në zgjedhje” dhe ndodhet në burg që prej 12 majit 2023, dy ditë para zgjedhjeve vendore.