Pas shpalljes së rezultatit të zgjedhjeve për Kryetarin e Bashkisë Himarë, festa shpërtheu në kampin e socialistëve, ndërsa në kampin e OMONIA-s dhe mbështetësve të Petro Gjikurisë, humbja u prit me zhgënjim dhe nervozizëm. Vangjel Tavo, kandidati i Partisë Socialiste, fitoi me mbi 17% diferencë nga rivali i tij.

Pamjet nga qendra e votimit treguan Sekretarin e Përgjithshëm të OMONIA-s, Marin Suli, teksa ishte filmuar duke mbajtur kokën me dorë dhe duke ndezur një puro pas shpalljes së fitores së Tavos. Suli, që është gjithashtu kryetar i KZAZ-së nr.88 të Himarës, dukej i mërzitur për humbjen e papritur.

Në këtë fushatë, sikurse ndodhi me Fredi Belerin më 14 Maj 2023, edhe pse OMONIA, PBDNJ dhe faktori grek prisnin fitoren e Gjikurisë, kjo nuk u realizua. Gjatë procesit të votimit, Suli pati përplasje dhe akuzoi socialistët për kërcënime ndaj komisionerit të koalicionit “Bashkë Fitojmë” në fshatin Vranisht.